跟隨資金輪動 多做短線操作
11月3日，大致天晴，呢幾日天氣暖返啲，間中一兩陣風。美股第N次創新高，三大指數齊創收市新高，道指升138點；標指跟納指分別升16點及53點。除咗三大指數之外，就連反映小型股嘅羅素2000指數，亦自3月以嚟第一次創收市新高。美國金融市場表現強勁，主要由於企業業績表現強勁，以及市場對疫情後嘅經濟復甦感到樂觀。今晚聯儲局開始召開為期兩日嘅貨幣政策會議，市場同時等待周五(5日)將公布嘅非農就業數據。
再有華爾街聲音提醒，隨住聯儲局收緊貨幣政策，加上企業盈利增速到2022年會進一步放緩甚至可能轉虧，股市的基本面正在惡化。而聯儲局縮減量化寬鬆(QE)措施的行動及潛在加息的可能性，恐將打擊市場富裕的流動資金。美國銀行認為，股市和債券之間嘅背馳唔會持續太久，貨幣政策環境向不利股市嘅方向發展，美股遲早會意識到呢點，故需為股市下跌做好準備。不過講咗咁耐美股會出現大幅度調整，但等到頸都長仍未等到呢一日，而有數據顯示，自1936年以來，標指喺11月跟12月的平均漲幅分別為1.1%和2.3%。喺呢段時間內嘅12月份，美股有79%嘅時間都係上升。換句話講，再多睇淡美股嘅言論，暫時亦未能扭轉美股強勢。炒美股提高警覺係有必要，短線有震盪難免，但又無須自己嚇自己，日日擔心股災。
至於港股噚日因為兩個利淡消息而強軟，再度考驗二萬五大關，其中一個消息係全球貿易戰再升溫，包括歐盟、英國和加拿大等32個國家，將取消給予中國「普惠制」的貿易優惠待遇。反映美國盟友集體助力抗華，加快「去中國化」進程，估計還有後着，或劍指中國作為發展中國家嘅「最優惠國待遇」地位。另一個利淡消息係地綠政風險上升，市場憂慮台海緊張局勢升溫，一旦台海爆發戰事，香港難免被波及。
不過暫時港股24800至25000有不俗支持，只要能守得住，後市又唔係太差，上述兩個利淡消息，噚日港股回吐已反映，今日又未必會因此再出現大幅度調整，暫時都係炒股唔炒市，捕住強勢板塊，跟隨資金輪動炒作，以短線操作為主，係應付目前市況較佳策略。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。