跟風炒作入場前計數兼嚴守止蝕
5月5日，早段能見度較低，局部地區有驟雨，下午天氣炎熱，大致天晴。隔晚美股一度重挫，重磅科技股領跌下，納指全日跌近2%，道指盤中曾跌347點，收市收復失地倒升19點；標指則跌28點，納指創3月24日以嚟最大單日跌幅。美股插水係因為財長耶媽突然放鷹，表示為確保經濟唔會過熱，有機會上調利率。而美國政府今年已出幾萬億美元刺激經濟措施，引發市場對通脹升溫憂慮。不過聯儲局主席鮑爺及其同僚周一重申堅持寬鬆立場，總算為急跌嘅美股帶嚟支持。除咗通脹加息問題，市場關注嘅仍然係印度疫情發展，當地疫情惡化，或衝擊全球經濟復甦進度，打擊投資者信心。
隔晚美股盤中急跌，確係嚇親唔少缸邊友，打定輸數今日港股或失守二萬八大關，不過瞓醍道指竟然倒升，港股今日又未必太差，二萬八關能守之餘，大家關注嘅係恒指能否盡快收復100日線(28565)，並重返10(28836)、20(28830)及50(28982)日線滙聚區。目前三線匯合但頭茸茸似向下，恒指需要盡快收復幾條移動平均線，方能脫離險境。
古天后一直有提升大家，喺目前市況下，只能多做短線操作，難以好似舊年呢個時候咁，吼跌市上車坐定定，自然可以穩坐釣魚船。自年初北水湧入後，港股成交大升，新經濟股屢創新高。但隨住內地資金傾向收緊，加上監管機構對平台經濟嚴厲執行反壟斷法，科技股高位回落，資金更由新經濟股，高增長股，流向傳統股及資源股。尤其資源股喺通脹升溫，經濟復甦需求提升下，商品價格節節向上，資金湧入炒作資源股，「爛銅爛鐵」股呢期表現相當標青。
疫後經濟帶動，原材料價格持續上升，更有大行揚言今年國際銅價仍有五成上升空間，原因係供需失衡，喺供應缺口下，金屬股被重估，市場資金追逐炒作，呢批股份由3月起步，閒閒地升咗三四五成，個別股價更創新高。雖然呢批股份已累積唔少升幅，但游資仍然停留喺呢個板塊下，短期相關股份仍有炒作，只係游資幾時撤退，再重投估值已大大被冷卻嘅高增長股，古天后無水晶球當然難以預測，只不過喺股市生存之道，其中一個實用哲學係有智慧不如趁勢，估計呢期相關股份仍然係炒作焦點，不過宏觀經濟仍存太多不穩定因素，跟風炒作記得嚴守止蝕，追乜嘢貨，乜嘢價追入唔係問題，入場前計好數，嚴格執行止蝕，方能長炒長有。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。