軟銀以阿里遠期合約套現 變相令阿里保持區間上落
8月4日，多雲，有狂風驟雨，雨勢有時頗大。美股隔晚繼續做好，雖然聯儲局鷹派代表指要提前加息，希望年底息口可以加至3.75%，不遆美股被樂觀情緒所籠罩，三大指數繼續向上。道指升416點，標指升63點，納指更升逾2%，勁升319點。雖然已公布業績嘅美企，大多表現未如理想，調低下季甚至全年預測，不過市場反而認為經濟可能衰退嘅情況下，聯儲局或放慢加息步伐，甚至明年要開始掉頭減息，只不過喺目前高通脹環境下，聯儲局基本上無乜可能放水，明年減息只係市場一廂情願嘅想法。
至於歐洲方面問題更大，俄烏戰爭持續下，能源成本狂升已令唔少歐洲企業吃不消，通脹高企令經營本大增，加上過去兩年疫情持續，令唔少企業債台高築，唔少企業選擇破產而非重組，可見歐洲唔少企業已抱放棄心態，對前景睇法悲觀。咁嘅情況下歐洲都無法放水，只能無奈地收緊貨幣供應，試問美國情況未有比歐洲更差，基本上無任何條件放水。
至於港股呢邊，未有擺脫上落格局，台海局勢緊張，早兩日中港兩地股市喺回調下，成交反而增加，反映跌市下沽壓又增強。不過隔晚阿里(09988)上升，並帶動其他中概股做好，主要係有報導指軟銀將透過預付遠期合約（prepaid forward contracts）出售所持三份之一阿里股份，融資220億美元。軟銀呢個舉動，無疑係令市場鬆咗一口氣，皆因軟銀咁大手貨，暫時搵到融資出路，唔需要喺市場直接沽貨，短期沽壓解除，對阿里股價係正面嘅。
不過軟銀呢一個動作，等同將呢批貨按咗畀銀行，雖然名義上軟銀仍然持有呢批貨，但實際上喺合約期內，銀行一方係有權動用呢批貨，喺市場操作。即係銀行見阿里股價高出合約嘅接貨價，銀行就有機會喺市場沽出，並以較低價格買返，即係可以高沽低揸，變相就會令阿里股價保持咗喺一個區間之內。即係喺一段時間之內，阿里都會喺區間內上落，不妨參考返近日阿里嘅股價高低位，底部係接近86-90元，而頂部係105-100元，可以喺呢個範圍之內炒上落。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。