逆市估頂做淡等同自殺
1月20日，大致多雲，日間短暫時間有陽光，晚上有一兩陣微雨。美股假後表現理想，拜登入主白宮在即，市場憧憬新政府將盡快通過刺激經濟措施，甚至加碼放水，聯儲局承諾維持寬鬆貨幣政策；而銀行業績理想勝預期，雖然相關股份逆市跌，但利好市場氣氛。科技股做好，帶領美股三大指數做好，納指收市再升逾1%。
港股氣勢如虹，多得北水持續湧入，尋日港股成交額突破3000億元，打破2015年『港股大時代』紀錄，恒指創20個月收市新高。港股通噚日錄得淨流入265.92億元，創互聯互通機制啟動以嚟單日新高。多得北水推動，港股愈戰愈勇，話咁快恒指已逼近三萬大關。
北水近日湧入，除咗係中資股份佔港股比重愈嚟愈多，目前逾七成市值來自中資企業，但目前相對A股，港股估值平咗一大截，喺北水眼中完全係特價貨，尤其係近半年人民幣回復強勢，更令港股再額外打折。另一方面，侵侵臨走前都要向中國『送大禮』，加碼向中國企業出制裁牌，目的當然係搞到中港股市一頭煙，北水肩負維穩任務，得到阿爺默許，北水自然積極掃貨。
唔少缸邊友見到呢個月港股狂升，逼近三萬大關，口淡淡嘅因子又發作，問古天后可唔可以買逆向恒指(07500) ，又或者沽期指。其實古天后一直強調喺股票市場操作，逆勢而行係大忌，咪吓吓去估頂同摸底，又唔係三文魚，乜事要學三文魚，以為自己可以逆流而上！緊記市場永遠唔會錯，錯嘅只會係自己，當強者資金湧入或流出，反其道而行肯定無好下場。尤其喺北水主導下，港股可以繼續升到你唔信，順勢而行勿估頂，逆市操作只有死路一條
當然幾時都要做好風險管理，大市由27000升至接近30000水平，期間有見任何較顯著調整，喺股份急升下，減倉獲利無可厚非，幾時都要做好風險管理。目前中國正積極開放金融業，中港兩地資產價格必需維持穩定，港股肩負中資企業集資重任，港股若然有咩冬以豆腐，就會失去吸引全球資金功能，為咗眾多中資企業嘅錢途，港股由北水睇場，暫時都係穩步上揚。
目前港股最大嘅風險，並非美國繼續狙擊中國企業與否，反而係中國經濟一定要順風順水，喺疫情後順利復甦，一日內地經濟自身難保，港股失去北水支持，家陣升得幾甘，他日就會跌得幾狠。不過喺呢一刻，北水繼續積極買貨，音樂椅遊戲一日未完，梗係霸住將櫈仔坐定定，至於呢個遊戲玩到邊日停止，古天后無水晶球，當然唔會預知未來，總之喺遊戲完場之際，能夠全身而退，就可以成為最終贏家。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。