通脹升溫下 美元或見萬劍歸宗
4月22日，天晴，日間炎熱，最高氣溫上到30度。雖然全球多地疫情再反彈，變種病毒喺亞洲區肆虐，曾嚇怕投資者，但美股仍處於牛市當中，稍有利好消息又回勇，隔晚有消息指拜登政府有意加碼刺激經濟，加上踏入業績期美企普遍能交出亮麗業績，美股隔晚止蝕，三大指數回升，道指跟標指升近1%，納指升幅更達1.19%。
港股噚日畀變種病毒嚇窒跌逾500點，加上持續有配股活動，影響市場氣氛，資金從新興市場流走，港股當然難逃一跌。幸而呢幾日仲有北水掃貨，過去四個交易日累積掃貨近200億元，令港股目前仍能保持喺28000水平之上。疫情再度因為變種病毒爆發，或窒礙全球經濟復甦，油價近日急跌，三桶油淪為拋售對象，尋日三桶油跌幅由1.55%至5.88%不等。
繼騰訊(00700)、美團(03690)先後配股抽水後，噚日再見安踏(02020)有股東減持，今日又有中國燃氣(00384)公司配股集資，同埋建滔集團(00148)大股東減持，分別集資116億及套現逾11億元。接二連三嘅抽水活動，當然影響市場氣氛，唔少缸邊友都問古天后，點解美股咁強勁，但港股完全唔起勁，呢個同美國持續放水，但內地卻傾向收水有關。
美國大開水喉刺激經濟，大開水喉狂印銀紙，代價係製造出有使以嚟最大資產泡沫，更向全球輸出通脹，一旦全球多地通脹失控，資金為求避險，定必如去年湧向美元，新興市場肯定大鑊。為咗應付變種病毒，較發達及富裕國家只有繼續控制流動人口控制病毒擴散，但長期經濟活動受限，新興市場發展中國家真係捱唔得幾耐。
近日亞太區疫情因為變種病毒而惡化，印度確診數字接連創新高，但印度政府仍然不忍全面封城，皆因經濟頂唔順。日本同受變種病毒影響，疫情大幅反彈，東京奧運大有可能被迫取消，日本一心靠舉辦奧運振興經濟，如今好夢成空，真係人算不如天算。雖然內地未見變種病毒肆虐，但下月香港開始放寬內地客入境限制，而內地並無計劃作出相應放寬，對香港嚟講係好事抑或壞事，古天后無水晶球，只有坐定定等睇戲。
港股自踏入3月份表現強差人意，表現如死蛇爛鱔般，唔少缸邊友已轉投美股懷抱，眼見港股成交如一池死水，難以回復年初風光日子，但政府仍執意於8月份開始調高股票交易印花稅，立法會進行《2021撥款條例草案》二讀時，招來多名議員批評。政府若一意孤行，只會令近日疫弱嘅港股舉步為艱。眼見港股成交較年初大幅縮水，加印花稅增加庫房收入，只怕係對市場理解不足嘅官府一廂情願嘅空想。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。