通脹升溫美股迎來深度調整
5月13日，天氣炎熱，局部地區有驟雨，部份時間有陽光。美國隔晚公布4月消費物價指數(CPI)按年急升4.2%，創2008年9月以來最大升幅，一個月前數字為2.6%，增速加快，亦高於預期嘅3.6%，部分係由於去年基數較低，按月升0.8%，亦遠高於預期的嘅0.2%。扣除食物和能源的核心CPI按年升3%，按月升0.9%，後者係1982年以來最勁，大幅高於市場預期嘅2.3%和0.3%。
呢一堆通脹數字震散美股，三大指數插水，道指跌近2%或681點，創自1月以嚟最大單日跌幅；標指跌89點，跟納指一樣跌逾2%，納指跌357點，較4月29日歷史高位已回落超過8%。
雖然聯儲局表示有關通脹加快升溫只係暫時性，不過市場似乎唔受呢一套，市場押注聯儲局將會喺2023年提高利率，比起聯儲局官員預算收緊貨幣政策時間為早。10年期美國債息急升至1.69厘，為自3月18日以嚟最大單日升幅。美國專家對通脹預測有分歧，高盛首席經濟師認為通脹上升係短暫，並非持續性；不過「鱷王」達利奧則警告，拜登刺激經濟計劃，推高通脹及美元貶值風險，睇法較為悲觀。
即使港股本身已較美股先跌一步，但唔代表港股可以避過一跌，尤其港股已一段時間跟跌唔跟升，美股隔晚插水，港股呢一轉下試27500尋找支持已不能避免。港股難搵食，唔少缸邊友已轉戰美股，但近日美股高位回調，喺通脹威脅下或迎來一輪較深度調整，家下港美兩地股市都難搞，又唔想坐住現金硬食貶值，愈來愈多炒鬼開始投入虛擬貨幣市場。
事實上，虛擬貨幣過去一年升幅勁人，基本無其他資產可與之匹敵，虛擬貨幣一哥比特幣升咗5.67倍，以太幣認受性提高一年更升超過廿倍，本來屬於玩玩下嘅狗狗幣累升203倍更加癲，相對虛擬貨幣跑贏股市幾十條街，任何一個股票市場連尾燈都見唔到嗰隻。
不過古天后要再三提醒大家，高回報即高風險，玩得虛擬貨幣要有一鋪清袋嘅心態，皆因如今虛擬貨幣並未有法定地位，美國當局更指比特幣係高度投機，將加強監管；更有地方限制虛擬貨幣交易，原因係虛擬貨幣會造成走資、洗黑錢、威脅傳統儲備貨幣地位等問題。各大央行會唔會出招打擊，係虛擬貨幣的嘅主要風險。
只係各地央行大開水喉，貨幣貶值逼使資金尋找方法抵禦現金縮水，尤其美元大幅貶值，已動搖其貨幣霸主地位，資金不得不尋求更多元化投資分散風險，資金無奈明知虛擬貨幣高風險，仍不得不參與其中，否則將落後於人。無論作任何投資都好，都要好好管理風險，只要計好數，有晒策略入場，又唔係要完全抗拒呢類新興投資產品。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。