通脹升溫航運資源股續受捧
4月28日，多雲，有幾陣驟雨，稍後驟雨變頻密，好彩到周末天氣會轉晴。市場觀望聯儲局會議，期望喺會議後能獲得貨幣政策未來路徑指引，美股隔晚窄幅上落。道指跟標指表現牛皮，前者微升3點，後者則跌不足1點；納指則跌48點。雖然美股目前估值較高，但考慮到利率趨升及通脹因素，美股仍有上行空間，而事實上，已公布業績嘅美企，大部份盈利表現超出市場預期，支撐美股享有較高估值。較早前急跌嘅比特幣隨住其認受性持續提高，以及Tesla舵手Elon Musk表示加大投資力度而回升，不經不學又重上55000美元水平。
嚟到4月尾聲，明日已到期指結算日，但港股表現仍然呆滯，恒指近日一直喺29000水平徘徊爭持，一直未能向上突破。坊間有唔少聲音又提到五窮六絕呢個老調，指港股好快將展開跌浪。古天后反而持相反睇法，尤其係今個月唔少大型配股抽水活動，但市場卻成功一一消化，而近日北水持續錄得淨流入，凡此種種皆反映市況唔差，喺唔見有重大利淡消息下，為乜一定要五窮六絕呢? 回顧去年五六月份時間，港股並未見傳統五窮六絕情況，即使當時疫情嚴峻，股市反而自3月低位回升並持續向上，主要係市場資金充裕，帶動股市走前於實體經濟。目前港股只欠東風，只要水到自然渠成，問題係港股暫時仍然缺水，但能咬住喺現水平，表現相對硬淨。
反而古天后擔心嘅最大風險，係下月香港開始放寬內地訪客來港「免檢疫」限制，未知是福是禍，即使港府昨日公布新一輪防疫措施，表面上放寬限聚禁聚，但條件係取決於消費者是否願意接種疫苗，尤其係食肆及酒吧防疫措施，要做到回復「正常」營業，需要員工跟顧客都會部打針，名義上嘅放寛門檻實在太高，實際執行混亂並有難度，估計所謂放寛，實際上難以於短期內取得成效。
暫時大市仍然炒股唔炒市，資源及航運股板塊持續受捧，古天后當然唔建議高追，但回調時要考慮搵位上車。資源股中，缸邊友一直憧憬油價將受惠通脹上升，但石油股卻非古天后杯茶，主要係全球減碳排放已成大趨勢，而美國頁岩氣供應不絕，油價喺現水平再大升有難度。反而貴賤金屬價格高居不下，甚至因為放貨寬鬆銀紙貶值，令大宗商品及金屬價格持續向上，相關資源股升浪料可持續。而全球航運需求上升嘅同時，反映航運價格嘅波羅的海乾散貨指數屢闖高位，航運股亦係值得逢回吐吸納嘅板塊。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。