通脹升溫高增長股風光不再
5月6日，大致多雲，日間短暫時間有陽光，氣溫稍降，最高氣溫唔到30度。美股隔晚表現平穩，道指又創收市新高，升97點至34230點收市，標指微升2點，但以科技股為主嘅納指則跌51點，跌勢持續。雖然財長耶媽澄清有關加息言論，但最近公布咗財報嘅公司顯示，需求激增和供應鏈短缺推動了價格狂升，多間公司都有提及通脹，唔少投資者開始擔憂經濟過熱，通脹重臨。
自去年爆發世紀疫情，多國央行均大開水喉救市，主要係估計疫情短暫，保持市場流動性可以防止股市急挫，奈何疫情已持續超過一年，就連疫苗開發商BioNTech始創人亦預測，疫苗於世界各地將蔓延至明年中，難於今年夏天回復正常。但央行放水瘋狂QE，通脹就係必然代價。踏入今年原材料價格上漲，加上供應鏈短缺推動物價上升，成本難以壓下，一旦通脹失控，經濟復甦之路更難行，基層民不聊生。
耶媽漏咗口風話加息，見美股急挫即澄清，咪以為耶媽係口快快亂咁噏，堂堂一國財長，地位舉足輕重，佢又點會唔知要慎言。耶媽擺到明係出口術試水溫，測試一下市場對加息反應，誰知一試美股就腳震，當然要向市場派定心丸，澄清有關加息言論。
隨住發達國家啟動疫苗接種計劃，以及各地央行大開水喉，經濟逐步復甦，消費需求回升，但去年因為經濟停擺，令唔少原材料及產品供應商大削產能，目前喺供需失衡下，好多產品價格上揚。而半導體及貨櫃供應短缺，進一步令供應受限，大宗商品價格急升，民生產品廠商已相繼加價，將成本轉嫁至下游消費者。可惜民眾薪金卻未見增加，失業率未有耐回復正常水平，開工不足情況比比皆是，消費者阻唔到物價上漲，通脹殺到埋身，有苦自己知。下星期美國將披露4月份通脹數字，預期將達2.6%，意味住已達到聯儲局2%目標，耶媽先出口術試試水溫時間啱啱好。
全球央行不斷放水，透過發債渡日持續先使未來錢，今年初起美國10年期國債趨息，反映整體融資成本上漲，同時亦係通脹重臨響起警號。若然國債孳息再度向上，升幅超過預期，美國貨幣政策亦侷住轉去「防止經濟過熱」，控制通脹威脅，加息係必然嘅事。
過去一年科技股，新經濟股，高增長股炒風旺盛，正正係依仗低息環境，貨幣寬鬆嘅策略，一旦情況逆轉，呢啲股份再難維持驚人高增長，呢個亦係自年初以來，呢類股份開始有資金流走，唔再受熱捧嘅原因。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。