逢調整吸納優質中企仍為主要策略
2月2日，天晴乾燥，日間氣溫上升至26度相當溫暖，部份地區有煙霞。美國散戶跟大鱷對撼，事件未有告有一段落，之前畀美國連登仔挾到股價坐火箭嘅GameStop(GME)沽空率銳減，由140%回落至50%，而其他YOLO(you only live once)嘅沽空股份則個別發展。美國連登仔轉戰白銀市場，相關白銀股集體急升，但升幅已經無之前咁誇張，但閒閒地升一成至五成，可見美國散戶有一定影響力。
幸而市場對相關活動加劇市況波動憂慮退減，雖然相關投機活動已將市場脆弱一面表露無遺。不過有專家分析今次散戶跟對沖基金對決嘅嚴重程度，不及過去廿年引發市場調整超過10%嘅任何事件。美股重大調整往往發生喺增長前景轉差，以及有迹象顯示估值過高，但家下只有少數美股股份出現極端價格波動或過度嘅投資者槓桿，應該唔會引發美股大幅調整，導致股災可能性更加係微乎其微。
值得留意踏入業績期，美股今個期會有多達99間標指公司派成績表，包括Google母公司Alphabet、亞馬遜、阿里巴巴、Snap、埃克森美孚、輝瑞和Chipotle等。而港股亦踏入業績期，阿里巴巴(09988)跟美股同步，今日打頭陣，為重磅股業績掀起序幕。
睇返噚日港股表現，恒指算高位30191點跌近3000點回落，噚日大幅反彈逾600點，只差一步重返29000水平。大市升升跌跌，古天后早已表現要習以為常，尤其喺北水參與度大增下，內地銀根鬆緊對港股影響更為明顯。好似上星期人行連續四日進行正回購，令市場擔心阿爺閂水喉，缸邊友三十六着，走為上着。事實上，去到上星期五，人行已重新展開逆回購操作，市場對人行操作唔需要過度揣測，為咗支持經濟持續復甦，確保金融市場穩定，阿爺只會採取鬆緊有度嘅政策，唔會無啦啦閂咗個水喉。
反而剛有報道指有國際機構擬將香港從法律合同中剔除，中美之爭繼續，甚至有可能與其盟友修好圍堵中國，呢一個趨勢不容忽視，而香港夾喺中美之間，定必有所犧牲，基於中港關係密切，香港喺別無選擇下，背靠內地發展已屬最好出路。香港最好嘅應對做法，當然係將中國門戶及地區金融中心的角色做得更好，香港作為中國內地吸引外資嘅角色並未有改變，反而危中有機。
當唔少人都認定香港玩完，港股好快死，古天后則認為喺香港成為內地最強中企上市集資基地，中國必定全力維穩，至少維持中港金融市場穩定係重要戰略。既然香港肩負呢個重任，每次港股調整，都係收集優質股份，尤其係中資企業嘅好機會，JATMX港交所(00388)仍然係低吸納對象。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。