重磅科技股彈升挾淡倉 小心好淡通殺
10月11日，天晴乾燥，颱風過後雨過天晴，不過留意嚟緊又有另一個颱風圓規隨時殺到。上周五美股偏軟，三大指數下跌，但港股夜期跟ADR則向上，唔多跟美股行，主要係市場憧憬中美雙方就貿易恢復對話，而中國促美方取消關稅及制裁。
其實港股挾咗上嚟，挾淡倉意味其濃，事實上，上周五美國10年期國債孳息曾觸及近四個月高位1.6厘，呢個正正係衡量通脹預期嘅市場指標之一。喺能源價格高企下，通脹或高企，而全球央行為咗唔傷害經濟復甦，實難以大幅加息與之抗衡，只能縱容通脹高企，央行正陷入兩難局面。
美股喘定主要係債務問題得而紓緩，兩黨同意將債務上限問題，拖延至12月才決定，意味着美國的違約或停擺，有望順延兩個月。不過問題並未真正解決，美國10年期長債孳息進一步上升，反映美債弱勢未止，仍然被沽售。若然美債孳息率升勢持續，美股反彈過後，喺高位仍然有機會作大幅度調整。
若然美股出現大幅度調整，全球股市亦會隨之下滑，港股亦難有例外，只不過暫時港股靠重磅科技股撐起，恒指重上25000水平，有機會向上挑戰25500水平，大約係恒指50日線( 25459)之所在。不過港股之後何去何從，仍得睇住美股發展，美團(03690) 落實被罰款34億元，市場視之為好消息，除咗罰款較預期少，亦估計對其整改已告一段落。
重磅科技股係咪從此雨過天青，古天后唔敢太肯定，雖然近日相關股份走勢好轉，但ATM升勢為挾指數淡倉意味其濃，尤其喺ATM跟較重磅科技股反彈之際，其他板塊卻逆市下跌，予人感覺大戶托住指數，減持其他股份，港股扭轉弱勢實言之尚早。港股目前仍被好淡兩方消息左右，雖然中美貿易戰有望緩和，但通脹殺到，能源危機一觸即發，內地限電突顯資源供需錯配問題，全球供應鏈或受影響，甚至令全球經濟復甦出現壓力等等，都令港股反彈道路變得崎嶇難行。恒指反彈阻力係50日線，之前港股已幾次反彈到50日線後無以為繼再掉頭回落，今次同樣戲碼或再上演，暫時都係先作壁上觀。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。