重磅股相繼被減持 港股易跌難升
9月2，大致天晴，日間天氣酷熱及乾燥，天氣炎熱。隔晚美股終於識得彈，道指早段曾跌近300點，收市倒升145點；標指同樣先跌後回升，收市升11點。不過納指則連跌5日，隔晚再跌31點，但跌幅已較盤中低位大大收窄。今晚將公布就業數據，一旦數據強勁，聯儲局加息無障礙，鮑爺講到明以控制通脹為首要目標，數據強勁就大條道理加息。相反，就業數據疲弱，雖然聯儲局加息未必咁狠心，但疲弱數據則反映勞動市場轉弱，消費者信心亦將走軟，係經濟衰退警示，而有分折指美國經濟步入衰退嘅可能性已高於五成。
美匯指數回升，一度逼近110水平，創20年新高，歐元兌美元曾跌穿1算，日圓亦喺亞洲時間兌美元高見140水平。歐元偏軟下，德國及義大利債息持續向上，下周歐央行議息，普遍預期加息幅度將達0.75厘。相對美國，歐洲面對更嚴重通脹問題，PPI只有36%，但通脹則達雙位數，好明顯已步入滯脹。其實早於上一個世紀，即自2008年金融海嘯之後，歐洲債務問題一直未見解決，只係靠負利率支撐一眾無盈利嘅弱勢企業，家下息口走勢逆轉，呢啲企業恐怕難以再吊住條命。
除咗美匯指數高企，對歐美股市並非好事之外，油價回落反映需求回落，其他資源價格亦下跌，通脹係有望見頂，但同時反映需求下跌，屆時加息步伐有望放慢，但都講緊幾個月後嘅事。
中美雙方雖然就審計底稿達成協議，但另一方面，美國繼續打擊中國高科技產業，美國政府宣佈將限制高端GPU出口中國，晶片股插水。之前晶片龍頭台積電已預警行業明年將步入低潮，AAPL及NVDA曾於6月要求削減下半年落單數量，以反映需求下降。
除咗晶片股中雷之外，新能源汽車股亦瀨嘢，除咗股神巴菲特開始減持龍頭比亞迪(01211)之外，其他新能源汽車股近日股價走勢亦每況愈下，除咗面對劇烈競爭之外，晶片問題亦會影響新車交付數量，暫時呢個板塊不直沾手。
主要股東減持多隻重磅股，令港股無運行，騰訊(00700)加多腳，佢自己畀南非股東減持，就轉向套現手上資產，有消息指騰訊計劃減持手上投資，套現千億。消息一出，美團(03690)首當其衝噚日跌6%，雖然騰訊未有正式行動，但出得呢個消息，持貨者更係快人一步，沽貨套現。講嚟講去，都搵唔到一個半個利好消息可以撐起港股，反而利淡消息一籮籮，睇嚟港股短期都係易跌難升。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。