重磅金融股派成績表 大笨象業績未值憧憬
4月26日，多雲，幾中有幾陣雨，氣溫清涼，呢幾日都係陰陰涼涼會落雨。美股上周五回升，三大指數向上，標指跟納指更升逾1%。較為矚目係係比特幣一度失守4.8萬美元，目前重上5萬美元關。留意比特幣走勢或影響美股，因過去幾個月，愈來愈多巨型美企已投資比特幣。
至於港股踏入業績高峰期，多間重磅金融股排住隊派成績表，先有大笨象(00005)明日派季度成績表，建設銀行(00939)及工商銀行(01398)等內地銀行股亦即將派發成績表，港交所(00388)季績亦將成為焦點。除咗業績之外，呢個星期四美國聯儲局議息，以及期指結算日前，恒指料窄幅上落，暫無方向，預期港股即使重上二萬九水平，暫仍欠缺動力向上突破，29500點阻力較大。
隨住內地五一長假期將至，壓抑已久嘅消費需求或於假期期間釋放，旅遊出行股及餐飲消費股或落鑊。不過有統計顯示，近十年滬綜指喺五一長假期前，下跌機會達到七成。加上市場憂慮內地進一步收水，而中美角力愈趨劇烈，加上內地對科網企業監管未有放鬆，預期港股呢段時間仍落後美股。預期港股仍受制29300至29500水平，但喺未有其他利淡消息，兼且北水持續錄得淨流入下，港股喺28200-28600水平有不俗支持。
明日派季度成績表嘅大笨象，季績前綜合15間券商預測，集團列帳基準稅前盈利中位數為33.46億美元(約260.98億港元)，按年上升3.62%。分析普遍指，即使今年未必派季息，但市場將聚焦「面向亞洲」嘅發展細節。過往大笨象及回購政策均為市場焦點，不過今年管理層已於今年2月公布去年業績時已表明，今年首季度唔會派息，要去到8月公布中期業先至會確定未來派息策略，更預告2022年底前都唔會重啟回購，對於派息跟回購，小股東暫時都唔好抱有咁大希望，券商主要將大笨象業績焦點轉移到淨息差及收入等指標。古天后認為即使大笨象呢一季業績較上季理想，但股價都唔會點炒得起，股價暫仍受制於45-48元水平，真係有心買股收息，大笨象唔會係好選擇。
周四聯儲局議息都預咗息率唔會有變動，但議息聲明對預測貨幣政策路向，包括何時縮減買債，以及何時開始加息，都係市場關注，甚至係調整投資組合嘅關鍵。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。