金牛年股市大牛 貪新不忘舊
2月16日，天晴乾燥，天朗氣清，牛年首個交易日有好天氣，好心情，自然有個好開始。喺港股過年放假期間，外圍股市做好，預期港股今日紅盤高開，雖然北水仍然放緊年假，但市場資金仍然充裕，假期前喺北水已收爐嘅情況下，恒指已成功攀上三萬大關。今日開市預期可以紅盤高開，古天后當然希望紅盤高開之餘可以紅盤高收，今日旗開得勝。
而喺金牛年，祝大家日日贏住數金牛，今年要做長勝將軍，同舊年一樣，要滿倉中資股喺手。舊年古天后不停提住要貪新忘舊，但今年喺疫苗面世下，疫情有望可防可控，全球經濟復甦，除咗要左擁新經濟，亦要右抱舊經濟股，而舊經濟股可以選擇嘅包括古天后建議坐穩嘅內需股；有涉足新能源汽車技術嘅汽車股；本月曾推介嘅重型機械股等等。
至於古天后長期愛股，ATMX及港交所(00388) 仍然係長線長坐嘅心水，不過騰訊(00700) 喺假期前有消息指其中一名高管被中國當局拘留，對中國一位前高級執法官員行賄，以及被抖音才控告濫用市場地位，要求法院判定騰訊應立即停止透過微信及QQ限制用戶分享抖音內容，並賠償經濟損失；此等消息或成為騰訊短期風險，但只要股價一日唔跌穿680元，上升形態未被破壞，股價仍會以大漲小回形式向上推進。
阿里(09988) 今年則可守得雲開，去年第四季馬雲失言間接令螞蟻集團上市觸礁，但近日已有消息螞蟻已跟監管當局達成協議，將盡快進行重組，雖然並未有重啟上市時間表，但今年否極泰來，料可追回去年落後於其他科技巨頭嘅升幅。而小米(01810) 踏入2021年表現遠遠落後於其他巨頭，除咗係美國將其放入制裁名單之外，市場亦擔心華為出售榮耀後，榮耀手機或對小米構成威脅。古天后就唔多擔心榮耀手機帶嚟威脅，本來榮耀就唔係華為嘅皇牌手機，失去華為光環嘅榮耀，唔見得競爭力會增加，反而小米喺三十皮樓下，係一個收集好機會。
另外兩隻近日焦點，係新丁快手(01024) 及平安好醫生(01833) ，前者憧憬好快會被納入港股通，成為北水新寵，後者則被美國科技女股神黑石成金，只係兩股已於假前急升，尤其快手已較招股價115元升咗幾個開，市值已逾萬億元，仲有幾大升空間真係要問水晶球，有貨坐定定，冇貨高追自己搵位止蝕。反而好醫生剛獲女股神建倉，睇返女股神舊年10月建倉嘅移卡(09923) 跟眾安在綫(06060) ，兩者喺女股神入場後，股價長升長有，預期好醫生升勢有餘未盡，若然遇到獲利回吐，股價稍為回茖，要把握機會上車，搭上連登契媽嘅順風車。Jefferies最新平安好醫生報告，目標價調高至211元，打個八折都可以見160元樓上。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。