長假期收窄戰線防外圍異動
2月8日，部分時間有陽光，早上有薄霧，日間溫暖。臨近農曆年假期，呢個星期港股只有三個半交易日，預期港股將收窄波幅，尤其北水喺明日開始暫停，至下周四先恢復正常，料呢個星期表現淡靜，可能喺29200至29800點之間上落，資金將會繼續喺不停板塊之間輪動，炒股唔炒市機會較大。
市場憧憬美國新一輪刺激經濟方案有望幾時星期之內推出，經濟前景轉趨樂觀，美股上周五做好，標指跟納指再創收市新高。總結全星期，道指、標指、納指分別累升3.89%、4.65%、6.01%。3大指數喺上星期錄得3個月以嚟最大單周漲幅。港股上周五ADR表現唔錯，大部份股份較周五收市上升，而恒指喺新加坡黑期重返29400水平，預期今日港股傾向做好。
值得留意係持續疲弱嘅美元，走勢似有逆轉跡象，雖然美國疫情仍未完全受控，但隨住疫苖面世應用，而新一輪達19000億美元經濟刺激方案推出，美國就業市場改善，美國經濟若能自疫情中復甦，美元或有望扭轉弱勢，而事實上踏入2021年以嚟，美元已累計反彈1.2%，美匯指數暫時已重返91水平。雖然美元一旦回復強勢，對股市或產生利淡影響，但港股喺北水主導下，所受影響將大大減低。
而人民銀行表示，2021年貨幣政策堅持「穩字當頭」、「不左不右」，並運用存款準備金率、再貸款、再貼現、中期借貸便利、公開市場操作等多種靈活政策工具以保持市場資金流動性合理充裕。內地已多次重申貨幣政策以穩為主，向市場大派定心丸，有助消除市場對內地貨幣政策收緊嘅憂慮。
周末期間有報道指，北京知識產權法院正式受理內地短視頻App抖音訴騰訊(00700)壟斷糾紛案。該案是自2020年底《關於平台經濟領域的反壟斷指南(徵求意見稿)》公布以嚟，內地首例發生在互聯網平台之間嘅反壟斷訴訟。反壟斷及反不正當競爭作為今年八大重點經濟工作任務之一嘅背景下，該案對於整個互聯網行業將產生極大影響，大家要留意有關呢宗訴訟嘅發展。
過去一星期港股走勢反覆，但隨住長假期步近，北水又收爐放假，呢個星期港股將開始收窄波幅，甚至呈窄幅上落悶局。長假期前部署例牌偏向保守，提醒缸邊友要好好控制注碼，除咗長線部署股份坐定之外，短炒盡量收窄戰線，以防新年假期間，外圍市況出現異動。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。