長周末將至一動不如一靜
4月28日，大致天晴，天氣炎熱。美股隔晚表現反覆，三大指數個別發展，走勢上都係先髞後低，納指更倒跌收市。市場繼續消化美企業績，不過即使業績後股價上升，亦似係超賣後技術反彈居多，古天后對美股後市睇法仍傾向保守。下周三聯儲局議息，市場早已接受今次加息幅度將達0.5%，市場更關注係議息會議對其後息口及貨幣政策路徑嘅指引，即係之後嘅加息幅度，以及6月開始縮表嘅進度。由於美國核心CPI仍高企，預期貨幣政策將進一步收緊，對美股嚟講當然唔係好事。
至於內地股市噚日反彈，不過未見成交大幅增加配合升勢，可能跟五一假期接近有關，不過上證指數仍距3000點有啲距離，睇嚟都係技術反彈多於轉勢。喺人民幣表現疲弱下，3月份外資從內地股市流走超過2600億元，即使近日有外資回復流入，相對流出數字只屬杯水車薪。
至於港股昨日回落至19600水平前有支持，恒指收市回升至19946點，不過全日成交只有1251億元，明顯未見新資金流入，能否支持大市進一步向上仍有疑問。加上今日北水開始暫停，喺期指結算下，大市仍未有方向，加上下周一假期，長周末假期前，睇怕都係悶局一場。
4月份港股結束自3月中港股回落至18200水平展開嘅反彈，至22400點回調，並回補3月中上升裂口，重返20000水平，大市回補上升裂口後，由於未見資金大量流入，大市只係喺20000水平附近上落，唔排除結算後或步入上落市反覆格局。暫時見牛熊證重貨區分布分別係19500至19700水平，而20500至207000則見大量熊證增加，喺大市未見方向，喺19500點20700呢千二點上下其手，好淡通殺易過借火。目前大市剛好喺20000水平, 亦即呢個範圍嘅中間位，無論做好做淡都唔多值博，反正長周末假期將至，呢兩日一動不如一靜。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。