長期將至一動不如一靜
1月26日，早上部份地區有薄霧，日間短暫時間有陽光，晚上有一兩陣雨。美股隔晚繼續反覆，道指早段曾跌逾800點，收市跌幅收窄至66點；標指則跌53點；但納指仍跌逾2%，跌315點。雖然市場仍然等待香港時間周四公布嘅聯儲局議息結果，但多數專家都對此不抱期待，皆因目前嘅數據已不足以令聯儲局停止收水，當局唔會因為美股被拋售而退縮，更有專家指目前貨幣政策嚴重落後於通脹曲線，甚至應該要即刻加息。
華爾街大行相繼唱淡美股，大摩投資總監就話暫時美股唔會大跌，但企業業績及盈利指引將為投資者「敲響增長放緩的警鐘」。佢預言標指仲有一成要跌，將失守4000大關，建議家下要採取防守型投資策略。高盛亦警告，多間美企業績指引令市場失望，加上聯儲局收水，進一步打擊企業盈利增長。
不過有趣嘅係有美股缸邊友搵燈神對賭，被外國網友視為「燈神」嘅股壇名嘴克拉默(Jim Cramer)「打倒昨日的我」，繼上周聲言股市快將「築底」後，啱啱卻轉軚表示科技股仍未跌完。叫得燈神梗係走勢方向反指標，過去多次錯誤預測，今個月初更建議買入Netflix，真係燈到唔燈。呢位大哥話科技股未有耐跌完，有缸邊友認為反而係見底先兆。
美股暫時走勢仍會相當反覆，面對呢啲情況，投資者只能盡量輕倉應對，高增長股被殺估值已成事實，暫時未係大手撈貨嘅時候，宜忍一忍手，反正香港呢邊都就放農曆年長假期，一動不如不靜，持盈保泰為上策。
反觀港股呢邊近日受美股影響較少，只係年關難過，但凡過年內地例牌缺水，加上北水由明日開始收爐，暫停至初七先回歸，本來已缺水嘅港股，再少咗支水喉，嚟近呢兩個半交易日，市況將轉趨淡靜。古天后早於聖誕節前已表示目前只宜輕倉，長假將至，都係要保守啲，暫時少做少錯，唔做唔錯。估計恒指喺呢段時間，將會力守二萬四，後市有冇得再上，關鍵係10日線(24449)跟100日線(24562)能否收復並企穩，呢兩條線一日未成功企穩，港股只會係現水平爭持，暫難向上突破。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。