10月12日，部份時間有陽光，係一個風和日麗嘅日子。聯儲局官員連番放鴿，美股已連彈四日，道指再升65點，標指跟納指分別升18點及96點。以前多次提到標指4300係一個重要支持，果然呢個位都幾守得，但估計去到4400-4450又再度返覆。暫時美股再炒減息概念，呢個概念都炒咗兩季，雖然美國經齊未完全回復至疫情前，但標指已從3500反彈至4400水平，升幅超過兩成，而個別股份更升五成甚至一倍，其實美股現價估值一啲都唔平，但憧憬未來兩年減息，經濟回復活力，企業盈利回升，美股早已偷步炒上，信未來兩年美國經濟漸入佳境，美股只能貴買貴賣。
美股焦點目前當然仲係講緊個債息，但企業盈利都相當重要，Q1標指盈利同比下降只有3.1%，遠比年初預測降幅達5%甚至更多低，結果帶來美股報復式反彈，反映美國經濟未如預期咁差，嗰啲美國經濟陷入衰退嘅言論，更加係不攻自破。至於去到Q2，企業盈利平均下跌6.5%，亦係合符預期，估計Q3喺營收輕微增長下，盈利有望增長5%，Q4進一步回升至10%以上，其中科技股經過裁員潮後，成本大降盈利復甦應該更為強勁。
呢個星期五銀行股將為新一輪美企業績期揭開序幕，由於經歷3月份嘅銀行危機，估計壞帳撥備上升下，盈利表現麻麻，但唔少銀行股嘅股價已回落至近日低位，若然業績出嚟唔係太差，唔排除有資金偷步抄底。即管睇睇嚟緊美股業績期，美股點樣發展。
至於港股呢邊似乎有啲轉勢，港股連升五個交易日，成功突破10日及20日線後，隔晚於ADR再升近250點。主要係前日收市傳出中國準備再出招刺激經濟消息後，今次阿爺唔係淨打嘴炮，噚日「國家隊」匯金公司入市增持四大國有銀行A股，雖然只係5億左右，但係自2015年8月以嚟再次入場，意義重大。雖然暫時未見外資重新入場，但至少淡友會先收歛，港股亦可借勢繼續挾升。
從技術面分析，恒指由17094點反覆回升，踏入10月除月頭兩個交易日下跌，至今已連升五個交易日，今日預期隨隔晚做好，若成功挑戰50日線，18249企穩，有條件進一步向100日線18702推進，而呢個位剛好亦係9月5日下跌裂口18725-18789附近。若然未能企穩50日線，即市回調支持位係18050-18150左右。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。