【盤房來料】 港股半日升逾600點惟成交略欠不足(080726).docx

港股半日升逾600點惟成交略欠不足 美股噚晚調整，半導體股未止跌，美股周二受壓，道指高開48點後，升幅最多擴大至233點，高見53289，再刷新即市紀錄，但其後轉升為跌，反覆回落281點，低見52774點。美市收市，道指倒跌130點或0.25%，報收52925；標指跌33點或0.45%，報收7503，納指跌302點或1.16%，報收25818。路透報道，中國DeepSeek正開發自主人工智能(AI)晶片，即係內地企業會多啲以國產貨替代進口，晶片股回軟係正常，NVDA股價曾挫2.3%，不過收市倒升0.7%；阿Man兩注分別190同195嘅貨仲喺手。南韓三星電子初步業績表現強差人意，未滿足市場期望，美光科技(MU)及英特爾(INTC)分別插水4.7%及9.7%，前者落到接近50MA，低位見過890左右，掛咗買盤喺888買唔到，最終決定喺928買返少少先。SpaceX正式晉身納指100指數成份股，股價反跌6.8%，不過多份報告開始追蹤SpaceX，給予「買入」投資評級，12個月平均目標價為236美元，以現價計有47%上升空間。當中，大摩更樂觀，指出新雲端(Neoclouds)短期內為公司最大業務，未來增長將主要來自AI服務需求，目標價為300美元。其他重磅股中，亞馬遜據報擬發債集資250億美元，為AI業務發展提供資金。INTC未開市就穿咗120，喺118先落車，其後股價穿埋50MA，今晚再睇睇100呢個心理關口守唔守，守到可能又會撈返注嚟短炒。DELL喺415出清貨尾單位後，竟然盤中又回到去上次買貨短炒個位395-400，膽粗粗買咗398，收盤上返417，有啲喜出望外，果然係有侵侵關照係唔同啲。另外噚日講咗會吼位買MFST，388排盤中咗；而META就608上咗車，望佢生生性性。 美國10年期債息一度上升7.4個基點，報4.553厘；對息口較敏感嘅兩年期債息漲6個基點，至4.185厘。紐約聯儲銀行總裁威廉斯，於霍士財經訪問中預期，能源價格下降將帶動美國整體通脹未來幾個月回落，重申當局政策處於良好位置，反映加息壓力正逐漸緩解。美滙指數一度升0.28%，報101.13，日圓曾揚升0.26%，報161.67兌每美元。加密貨幣「一哥」比特幣一度回落3.1%，報62623美元，其後回穩。 至於港股昨日稍為抖抖氣，恒生指數低開47點，一度升204點至23820高位，觸及20日線後遇阻，其後轉升為跌，盤中曾跌218點見23398低位，其後跌幅收窄至119點，報收23496，成交額3197億元。一如所料，港股反彈之路並不平坦，20日線即遇阻力，雖然反彈遇阻，但恒指已較6月低位22518反彈逾千點，目前市場對於港股究竟在五窮六絕月已完成調整，成功於6月尋找到低位並再度展開一個中期升勢，抑或僅屬嚴重超賣下技術反彈，仍存分歧。不過今日港股又變身，恒生指數高開44點後升勢持續，一度升618點至24115，最新升560點或2.38%，半日報收24057；半日大市成交1883億元，呢個成交額配咁嘅升幅，就唔算得上合格，有少少挾淡倉意味。至下半場返嚟升幅再擴大，似乎有心挾死淡友，期貨大戶似想逼死埋24200隻重街貨熊，今日殺埋呢隻熊仔，或者都要做一做回踩。 港股上半年由1月逾4年高位28056開始下滑，最多累跌5538點或19.74%，技術上極端超賣，適逢美伊戰事緩和，國際油價回落，加上半年結後，全球資金資產重新配置調整，開始有部份資金流入極度低配嘅港股，成為關鍵外部催化劑。與此同時，上市公司開始積極回購，以騰訊(00700)為例，6月份每個交易日都有進行回購，共涉資97.74億元，較5月份45.13億元倍翻，年內累計回購金額更突破250億元大關；而友邦保險(01299)及小米(01810)回購亦不手軟，年初至今分別斥資136.45億與109.57億元，進行回購；而於過去幾年股價跌跌不休嘅美團(03690)，亦於上月底一連兩日斥資近億元回購，為管理層於股東周年大會上直言「價值被嚴重低估」後嘅跟進行動。多間公司進行大規模回購，有助港股加快築底，不過暫時外圍市場剛好開始調整，而宏觀環境下，海外息率趨升陰霾仍在，雖然港股目前市盈率僅11-12倍，但跟過往觸發外資流入買入極殘港股嘅單位數約8-9市盈率仍有一段距離。技術走勢，均線目前仍處於空頭排列，不過企返穩條20日線，再補埋6月18個24163至25254，企到個裂口頂，就有機會再逐步向上挑戰50日線約25000水平，剛好亦為日線保力加通道頂部。不過裂口無法完全回補前，仍有機會再回踩24000及23800條20MA回測支持力度。