10月11日，大致多雲，日間大部份時間有陽光。美國聯儲局官員相繼「放鴿」，主要指金融條件收緊對經濟構成限制，有助遏抑通脹，從而降低咗進一步加息嘅必要性，利率期貨顯示，11月及12月加息機會分別減至12%和26%，為升至過高嘅債息降溫，美元亦隨之回落。隔晚美股繼續反彈，三大指數連續升三個交易日，道指升134點；標指跟納指分別再升22點及78點，標指明顯守穩4300，暫時要睇上升通道頂部4480阻力過唔過到，VIX回試17水平。
明晚美國將公布9月CPI，係一個比較重要嘅數據，預期增長3.8%，主要留意核心CPI變化，喺二手車價格接升下，環比增長可能達0.3%，但同比增長降至4.1%。其實美國經濟衰退程度遠低於市場預期，主要係疫情期間大搞QE，政府狂派錢令家庭儲蓄佔可支配收入急升，散戶大量資金湧入美股，支持美股喺疫情期間亦大幅上升。
睇返中港股市呢邊，長假期後A股連跌兩日，內地出遊數字表現理想，但相關股份周一卻大跌，反映資金一直趁好消息出貨，外資沽貨無停手，陸資沽貨更狠心，場人資金面偏低，過去兩日深滬股市成交不足8000億元，雖然較9月底平均每日成交額6500億元有所回升，但遠低於第一季平均每日9500億元成交額。
正正因為A股跌跌不休，阿爺噚日收市後再度出招，有報道指中國準備再出招刺激經濟，可能再發愈萬億元人民幣國債，消息刺激反映中概股表現嘅金龍指數急升逾3%，港股ADR升近二百五點，黑期今早重上17900關之上。其實噚日消息一出，現貨恒指收巿後，期指已抽高百幾點至高水超過二百點，昨晚夜期收17981點，最高見18010點。預恒指今早高開挑戰萬八關，較大阻力係由9月初高位回落至17100水平跌幅嘅反彈黃金比0.618，大約18200關口，而20日線17710則變成支持，企等20日線及萬八大關，短線仍有望挑戰50日線，但18300-18400阻力更大。
不過留意返，之前阿爺減息降準狂放水，但未見有真金白銀流入實體經濟，主要係民間已無力再借貸，銀行放水亦無人肯借，反映經濟差到一個點，呢一點噚日古天后都講咗。不過下月中，將會舉行習拜會，睇睇兩位首腦見面後，中美關係會否有所緩解，若然雙方關係改善，有助中港股市喺最後一個季度做返好少少，話晒年底都要粉飾櫥窗，基金佬唔做返靚啲盤數，年尾份花紅就凍過水。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。