8月4日，部份時間有陽光，有幾陣驟雨，早上局部地區有雷暴，下午天氣酷熱。美國被信貸機構調低評級，美債息上升，令美股偏軟，但三大指數跌幅溫和，VIX隔晚一度高見17.42，但收市又去返16樓下，即係市場唔算好恐慌。標指至今已有近七成公司公布咗業績，整體表現唔錯，市場對企業下半年業績有較高期望。
盤後蘋果公司跟亞馬遜公布業績，蘋果公司公佈連續3個季度收入下滑，主要係iPhone銷售不達標，其他產品銷售仍略遜預期。蘋果業績平平無奇，暫時難有驚喜，目前32倍PE吸引力唔大，盤後跌2%至187美元。無貨又想買貨，似乎等下先，去到160-170美元先收集好啲。反觀亞馬遜，無論營收及盈利都超過預期，盤後股價升8.7%，雲服務增長12%，跟其他供應商差不多，廣告收益增長達22%，從相關股份包括Google跟META見到行業復甦，因為廣告收入上升，預示經濟復甦即將來臨。
至於中港股市呢邊，阿爺近日不斷出招救經濟，鼓勵民企擴張，方便民企借貸去創造就業機會。恒大系相繼復牌，反映阿爺無意由得恒大就咁死咗，欠債24000億，全球最大債仔一倒下，將拖死埋銀行業，萬萬不容許發生。唯一做法係畀恒大喺資金市場生存，復牌畀佢有機會喺市場集資，強化資本係唯一出路。提倡民眾買基金，再由基金買股票，待基金去認購內房嘅配股，雅居樂(03383)就啱啱做咗，內房需要集資強化資本，先有條件繼續存活。只要銀行唔出現大量呆壞帳，唔好拖死啲內銀，外債有拖無欠，拖欠供應商嘅錢，由得供應商自生自滅，死一半供應商，間接令內房嘅供應商債務減一半。
而今早中國人民銀行貨幣政策司司長鄒瀾4日在新聞發佈會表示，一方面，降準、公開市場操作、中期借貸便利，以及各類結構性貨幣政策工具都具有投放流動性的總量效應，需要統籌搭配、靈活運用，共同保持銀行體系流動性合理充裕，綜合評估存款準備金率政策，目標是保持銀行體系流動性的合理充裕。另一方面，要科學合理把握利率水平。既根據經濟金融形勢和宏觀調控需要，適時適度做好逆週期調節，又要兼顧把握好增長與風險、內部與外部的平衡，防止資金套利和空轉，提升政策效率，增強銀行經營穩健性。
呢啲就係噚晚預示嘅組合拳，講嚟講去都係強化資本市場，問題係資本市場係要靠大量外資流入先能夠強起嚟，阿爺呼籲民眾入市，但普羅大眾已被割韭菜多次，仲有冇咁多韭菜可割係一個問題，你叫做好，人哋外資堅持做淡，結果小股民唔做韭菜做大戶點心。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。