11月1 日，天晴，天氣乾燥，日夜溫差較大。喺議息前，隔晚美股低開高收，道指升123點；標指跟納指分別升26點及61點，標指已守4100，兩日回升至4200左右遇阻，VIX回落至18水平，恐慌過後市場沽壓減退，Tesla於200美元樓下及蘋果喺170美元樓下有支持，均利好市場氣氛。
目前市場焦點喺今晚凌晨嘅聯儲局議息會議，議息後聲明將會係未來息口走勢嘅一個提示，目前美國CPI回落至3.8%，息率則升至5.25%，已有效控制通脹。加上近月長息回升等同一次加息效應，估計年底再加息可能性較低，要睇鮑爺會否轉口風放鴿。不過單睇10年息走向，加上3倍長債ETF TMF沽空比率高達500%去睇，駐紮於美股嘅空軍肯定尚未退兵，好淡雙方仍有一番攻防戰。
空軍力久不衰，主要係美聯儲偏鷹，加上美國赤字達1.7萬億美元亦引發擔憂，財赤擴大主要係利息支出由5千幾億美元，急增至今年近萬億美元，隨著息口上升，加上國債規模增至33萬億美元，未來幾年利息支出將幾何級數上升，明年肯定會突破1萬億美元，利息支出將超過政府收入25%，成為空軍沽空美債嘅藉口。為咗填補資金缺口，財政部喺過去3個月裡，已發行7500億美元新債，高息環境下，未來白宮只能似債養債，空軍當然更放肆出手狂沽空美股美債。
市場上睇法有兩派，一方係認為通脹無法回落，息口高企，美債遲早爆煲，另一種睇法係美國政府開始頂唔順利息支出，學日本一樣負利率加QE壓返個息落去，但可能美債就無人肯買，就由美聯儲出手買，好似日本央行正正係日本國債最大持有人，合共持有46%國債。
10年債息高企不下，美元走強不利新興市場，內地隔夜利率噚日突然急升，離岸人民幣急插至7.34。但阿爺為咗救市，手上人民幣越印越多，美元卻因外資徹退不停流失，人民幣自然跌跌不休。相信阿爺係唔介意人民幣有序下跌，有利增加出口競爭力，同時能減輕國內資產下跌壓力，不過發行咗外債嘅企業就相當不利，企業好易爆煲。呢個係內地股市喺阿爺救市下跌唔落，但又升唔起嘅原因。
港股10月結下跌近300點，恒指收全年低位17112點，全月跌697點，11月能否反彈，取決於好友能否利用好消息反擊，包括鮑爺放鴿，習拜會等消息。只係一直無成交配合，大市反彈亦困難重重，至少要企穩20日線，即17400-500水平，先有機會嚟一個較似樣反彈。相反再失萬七關，本月再穿底機會甚大。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。