9月15日，大致多雲，有幾陣驟雨及雷暴，部份地區雨勢較大。美國零售銷售及PPI均高於預期，核心CPI按年升幅則放慢至近兩年最低，對利率較敏感嘅美國2年期債息應聲跌穿5%，10年期債券則先升後回，市場憧憬息口見頂 。另一方面，歐洲央行己預告停止加息，美股炒上，隔晚晚道指收市升331點，標指及納指分別升37點及112點。美股仍然係高位整固，標指再升至4500水平，下周聯儲局議息若唔發放太過鷹嘅訊息，美股仍有機會再向上突破。
雖然年初時坊間唔少人認為美股今日冇運行，原因係高息下經濟或陷入衰退，但一路走來，即使去年科技企業及銀行掀起裁員潮，都只係影響高收入人士，其他就業情況維持強勁，服務業及餐飲業更需加薪請人，美國經濟仍有一定底氣。而各項數據亦反映美國經濟韌性，早前WMT CEO已暗示美國零售復甦勢頭遠好過早前預期，並調升Q4收入預測。雖然高收入人事或因失業及轉職而收入減少，但美股持續上升，投資回報收益唔錯，人民自然仍願意消費，所以零售復甦勢頭唔錯，美國經濟情況既無陷入衰退，反而有些微增長，預期通脹受控下，即使增長緩慢，甚至放緩，但未見有陷入衰退跡象。
另外人行噚晚宣布今日起降準0.25%，釋放更多資金，銀行喺放貸上可更進取。港股於ADR回升至18200水平，夜期及黑期都升逾百點，預期恒指今早高開。若然能夠成功挑戰10日線及20日線企穩，港股或有望轉勢，但成交方面，至少要持續維持喺1200億成交額，仲要持續有咁嘅成交，先叫配合，否則都只係短暫挾淡倉。港股成交萎縮，現貨市場乏人問津，指數淪為大戶賭博工具，好淡雙方角力，將指數舞高弄低，但實實在在買貨坐定定喺大戶少之又少，外資一去不返，港股只有繼續喺有波幅，冇升幅嘅路上徘徊。
不過從阿爺近日一連串動作，可見阿爺救市決心相當肯定，相反港府呢邊慢十拍，單係點樣激活港股成交，連最簡單減印花稅減低交易成本都唔快快手手去做，成立乜嘢研究小組，都只係浪費時間，何不實實際際先減印花稅，作為全球最高交易成本嘅市場，先唔講乜嘢政策市風險難測，交易成本高企等於趕客，咁簡單嘅道理都唔明，仲要拗氣話減印花稅係無幫助，司長嘅諗法，我哋呢啲凡夫俗子好難明白。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。