8月30日，部份時間有陽光，天氣酷熱及乾燥，颱風逼近留意天氣變化。隔晚美國公布待業職位降至880萬，創28個月新低，僱主減少請人，反映未來經濟或放緩，加息壓力自然退減，10年期債息跌1.4%，美股再度向上，道指升292點；標指升64點；納指升238點。標指能夠穩守4300重要支持後再度回升，而VIX只係上咗17一兩日即見回落，反映市場對高企嘅美股唔大擔心，反而喺早兩星期美股稍為回落，已見有買盤再度進場，持貨者亦惜貨如金，未肯輕易沽貨離場。
雖然大企業喺過去一年大舉裁員，但美國失業率仍偏低，主要係復常後餐飲及旅遊業復甦，提供大量職位空缺，人手不足如酒店業，加薪一成仍然請唔到人。不過職位空跟失業人數比例，從去年9月峰值的2.1降至1.5，但今年3月職位空缺已見減少。就業數據如唔太理想，聯儲局亦再無藉口加息，唔加息當然利好股市，所以隔晚數據一出，利率期貨已預示預估年底前再加息機會由51%跌至43%，唔加息更由38%增至52%，睇埋今晚小非農數據可以進一步確定。
中概股亦隨美股向上，一向熱炒嘅拼多多(PDD)業績靚仔，股價急升15%，喺內地降級消費下，以賣平貨為主嘅拼多多成為電商中嘅贏家，3大電商平台，淘寶基本上是零增長，京東跌至高單位數，拼多多部份銷售增長過1倍，高下立見。三大電商平台中，很明顯係淘寶不斷被搶市佔率，目前無力還拖，提出乜嘢分拆6項業務，表面係改革，實際只係無咁多閒錢再燒，亦要保留實力跟京東(09618)及拼多多兩個電商平台對手比併，京東暫時亦只能自保，能保住市佔率唔被搶走已係輸少當贏。
至於港股呢邊，阿爺推組合拳救市，繼減半股票交易印花稅後，再放風下月減息降準，又限制主要股東及董事沽A股，同時傳當局予基金指導意見，要避免淨沽出股票。加上近日美國商務部長雷蒙多訪問中國，市場憧憬中美關係改善，利好中港股市。反而香港呢邊仍然係慢半拍，加印花稅唔見要成立乜嘢小組研究，但要救活股市，最直接係減返個印花稅，都話要成立乜嘢研究小組，真係令到缸邊友忟憎。港股基本上估值已夠低，但對外資嚟講，難以評估嘅政策風險因素仍令外資卻步，北水雖有趁低吸納，但亦未肯坐定定，彈出彈入已成常態。
至於內地債務問題，阿爺當然想解決，只要Keep住銀行繼續借錢畀債仔去還息，無論係地方債或企業債務，一日債仔還到息，唔變呆壞帳，自然唔會爆煲。問題係國有銀行如何有無限資金去一再借予債仔無限循環支付利息，人行只需調升M2，印印銀紙自然解決問題，呢個亦係每年新增貸款不斷增長嘅原因。不過人民幣持續印銀紙，人民幣貶值係必然嘅事，購買力下降通脹上升，人民幣跌跌不休，係換取債仔唔死，銀行無壞帳嘅代價。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。