9月25日，部份時間有陽光，間中有一兩陣驟雨，下午天氣酷熱。美聯儲局上周議息，言論偏鷹，上周五股早段反彈後尾市回軟，三大指數低至接近全日低位收市，道指跌106點；標指跟納指分別跌9點及12點。由於目前美股估值唔算平，加上空軍喺8月份已回補大部份淡倉，短期難叫資金高位追貨，值博率不足下，標指下試4300支持，資金都係偏向低位儲貨，暫時沽壓唔算嚴重，但留意VIX已上咗17水平，較大幅度嘅調整壓力增加。
息口走勢仍然係市場焦點，周末兩黨又要就明年財政預算進行商議，若雙方未能達成協議，美國政府10月停擺風險上升。雖然大家都知最終協議可達成，但未到死線，都不斷會用停擺呢個藉口做淡美股及美債。而美國汽車工會罷工，亦成為淡友沽空美股美債嘅藉口。
另外要留意中國公布嘅財新製造業PMI及服務業PMI兩項數據，今年8月份美國庫存問題漸漸解決，美國已恢復部份訂單，呢一次訂單重來，中國可以受惠幾多好難預料，因為大部份生產線喺疫情期間，已由中國分流至印度、越南及孟加拉等地，所以美國去庫存後再增訂單，中國亦未必能受惠。而生產線從中國撤走已成事實，短期睇怕好難逆轉。
港股上周五先跌後反彈，早段恒指裂口低開見8月低位後，全日向上拉升，更重返18000水平，成交額1018億，咁嘅成交完全配合唔到由低位拉升嘅動力，結果去到夜期時段已見腳軟。上周五港股拉升，主要係傳出內地正考慮提高外資對部分A股持股比例上限，以及中美雙方成立經濟工作小組，消息刺激中港股市低開高走，收市大幅倒升。可惜到夜期及ADR時段，升勢未見進一亦擴大，反而係有啲腳軟。
講到底，無論中港股市喺外資於上半年大幅撤離後，已一去不返，暫時外資未見對中港股市回復信心，主要係頂唔順內地嘅政策風險之餘，中港企業嘅管治質素亦強差人意。大股東未見真心為小股東創造價值，反而係利用上市公司玩弄財技，剝削小股東利益，久而久之，投資者對中港股市只要投不信任票，即使一再推出救市措市，亦唔會再有資金願意落搭。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。