阿爺重擊科網股為理財通開閘做準備
8月4日，短暫時間有陽光，間中有幾陣驟雨，稍後時間驟雨較多及有狂風，局部地區有雷暴。雖然美國變種病毒肆虐，疫情仍然持續，但投資者對經濟復甦仍感樂觀，美股先跌後回升，標指更創收市新高。道指收報35116點，升278點；標指收報4423點，升35點，創收市新高；納指收報14761點，升80點。美企派績表，普遍交到功課，支持投資者入市信心。FactSet數據顯示，截至上周五，喺已公布財報嘅標指成分股公司中，88%嘅公司報告第二季度盈利超出預期，這是自FactSet於2008年開始跟踪該指標以來最高百分比。
不過中概股受監管風暴影響，噚日到手遊股被開刀，喺美國上市相關股份，全部跌至一個七皮。有分析指相對於美企而言，中概股估值正處於25年來最低水平，認為中概股具投資潛力，更相信中國係值得投資者進行豪賭嘅地方。雖然中概股現價估值已變得吸引，但噚日又見官媒向網絡遊戲業發炮，即使後來相關批評文章已下架，投資者已成驚弓之鳥。
內地監管之聲不絕，上星期已嚇怕中港兩地投資者，雖然中證監等部門約談券商派定心丸，話中企合規的話可以照去美國上市，只不過人家美國就話你都咪過嚟上市喇，一盤冷水照頭淋。中證監呢頭撲火，轉遆頭噚日又見官媒向網絡遊戲業務發炮，彈出彈入，投資者無所適從，真係無言以對。
雖然同時有官媒評論，指港股嘅估值已現吸引力，係布局時機；但係手上唔少蟹貨嘅缸邊友，並非子彈無限，見到呢啲評論，都只係無能為力。坐到一倉科網股蟹貨，如未有理會古天后自5月起已多次呼籲減倉輕倉，如今除咗得個坐字，真係無乜嘢其他辦法。至於目前係咪撈貨嘅時機，古天后認為對於科網股，暫時都係眼看手勿動。
內地監管機構不斷整頓科技企業，主要係為咗之前估值高企嘅相關企業擠掉多餘水份，目的係為咗其後大灣區跨境理財通開閘鋪路，由於年初時唔少北水高追科網股，已令唔少北水坐艇損手，為免理財通開閘後案件演，所以狠心打壓科企，由得監管風暴上演，就係唔想北水再追貴貨。阿爺咁做，對內地股民夠晒照顧，可憐香港股民就自生自滅。所以幾時炒股都要有策略，先唔好計贏幾多，定好止蝕位，一見唔對路先斬倉保本，否則坐艇愈坐愈深變潛水艇，就算有其他機會亦得個睇字，永遠都係市場輸家。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。