阿爺雖派定心丸 惟市況仍反覆
7月30日，多雲，有驟雨及狂風雷暴，雨勢有時頗大。美國第二季國內生產總值(GDP)按季以年率計增長6.5%，升幅低於市場預期嘅8.5%，反映雖然當地經濟正走出疫情，但離全面復甦仍有一段距離，換句話講美國暫時難言收水。既然貨幣寬鬆政策將繼續維持一段時間，美股繼續炒作，三大指數續升，道指盤中再創歷史新高，雖然收市升幅收窄，但收市仍錄得153點升幅，標指跟納指分別升18點及11點。
港股經過周初急跌後，連失多個支持位後，阿爺擔心中港兩地股市深不見底跌唔停，急急派定心丸，更連環出夠四招，港股噚日反彈逾800點。五未窮，六不絕後，七月港股唔識翻身，反而係反晒艇，喺7月份全球十隻市值蒸發最嚴重嘅股份，九家為中資業，騰訊(00700) 股價及相關新聞 蒸發逾1700億美元(約1.32萬億港元)居首位，其餘依次為阿里巴巴(09988) 股價及相關新聞 、美團(03690) 股價及相關新聞 及拼多多，唯一上榜非中資股是Prosus，但騰訊係佢嘅最大股東。
為咗按撫市場情緒，中證監喺周三晚急急同國際投行高層網上會面，會上除咗強調監管教育股只為針對行業政策，監管無意全面搞死其他各行各業之外；當局透露，只要符合上市要求，中國仍允許中企到美國上市，包括以使用可變利益實體(VIE)架構模式掛牌，叫做連出兩招釋除市場疑慮。
中證監做嘢之外，官媒亦全方位配合，唔單指強調內地股市基調良好，而中國對外開放步伐不會放緩，強調「資本市場全面深化改革不會停止」；另一則寫監管政策非打壓，而是促進行業健康發展、維護網絡數據安全和保障社會民生。
阿爺維穩唔係得把口，人行亦出嚟放水「護盤」，結束連續20日百億元人民幣逆回購操作，向市場淨投放200億元人民幣，此為人行自6月30日後首次加碼。幾管齊下救市，港股噚日總算有得彈，不過自己友「北水」似乎仍然信心不足，噚日北水錄得淨賣出46.18億元，連續9日走資逾428億元，主因美團和騰訊分別再被淨沽出47.06億元及6.91億元。
相信市場仍要時間評估內地密集監管措施影響，而早兩日外資基金拆倉減磅後，短期唔會又急急腳食回頭草，估計港股失守27200呢個重要支持位，恒指跌穿250日線後，技術上已入熊，除非有重大利好消息下，港股成功收復250日線並穩其上方能轉勢，否則呢段時間都係反覆。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。