阿里仍頽廢 科技股暫難大翻身
4月21日，天晴，氣溫回升，日間天氣炎熱。美股繼續調整，三大指數周二續挫，跌幅由0.68%至0.92%不等。全球多地疫情反彈，影響投資者情緒，出行股回軟，航空股跟郵輪股全部插水。雖然美股連續兩日回軟，但目前仍接近歷史高位，而道指跟標指自年初自今至升約一成，出現回吐亦屬正常，唔需要見美股回吐又大嗌「股災來了」，暫未見到美股出現股災現象。睇返道指跟標指，仍處於一浪高於一浪形態，只要仍處於上升軌內，暫時未見任何方向性逆轉。
至於港股古天后已多次強調仍處於上落市格局，市場最擔心係港股唔跟美股升，但美股一跌就跟足甚至跌突，主要係港股缺乏資金動力，即使港股呢兩日曾重返二萬九水平，但成交未見增加配合，港股仍難走出區間移動嘅框框。
美團(03690)配股及發行可換股債券集資，話就話市場五行欠水，但仍能成功集資近百億美元，而主要股東騰訊(00700)更認購逾千萬股，涉資4億美元。今次美團配股前，先由騰訊借出舊股，所以上周曾見CCASS出現調動，令市場揣測會否有大股東減持，直至美團日前配股，大股東減持疑慮一掃而空，騰訊唔單止未見減持，更額外認購新股，總算為美團前景投下信心一票。
雖然美團完成重量級集資計劃，為科技股打咗一口強心針，但科技股何時能走出陰霾從出發，仍要睇另一龍頭阿里巴巴(09988)何時轉勢。雖然科技股已較高位調整唔少，殺估值已完成，股價再大幅下調壓力已消化，但科技股大幅反彈，再集體落鑊大炒嘅條件已不復再，主要係幾隻龍頭巨企，尤其阿里表現相當頽廢。
阿里被阿爺巨額罰款後，旗下螞蟻集團仍要進行整改，早前更有消息傳出，需要踢馬雲出局，即使有關傳聞已被阿里否認，但空穴來風，未必無因。馬雲一向被阿爺視為反叛壞孩子，去年衰多口間接令螞蟻集團上市計劃夭折。阿里雖然已誠心改過，被罰亦欣然接受兼乖乖為螞蟻進行整改，但馬雲目前喺阿里影響力仍大，要阿爺真正「放過」阿里，睇嚟需要阿里徹底修正，除咗公司進行重組整改，馬雲或需要淡出，並引入國資，公司完成規範，阿里能重回正軌，整個科技股板塊氣氛改善，科技股方能大翻身。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。