阿里又傳好消息 慎防又嚟狼來了
3月29日，多雲，間中有幾陣雨，有時風勢頗勁。隔晚美股表現反覆，無特別消息，但SVB能夠順利拆骨出售，加上有價有市，市場對銀行風暴憂慮減退，債息回升不利科技股，納指跑輸，跌52點；道指跟標指分別跌6點及37點。目前市場普遍傾向相信SVB係單一事件，主要係管理不善導致破產，而非銀行財政出現問題，而其他銀行股急跌，都係空軍沽空後，刻意製造謠言，令市場恐慌，
噚日歐洲當局主動調查有關500萬歐元嘅德銀CDS交易，懷疑有人刻意挾高德銀嘅CDS去製造恐慌，令上週五一眾歐洲銀行損失了300億歐元市值。歐洲出手調查，睇怕空軍唔敢再太過放肆，惡意沽空應該收歛。雖然目前有關當局未有短暫禁止沽空金融股，但係着手調查，都有助擊退空軍，唔敢再重施故技。
雖然銀行風告一段落，但空軍已轉移目標去沽空啲商業物業REITS，高盛有報告指目前SMBS負債規模達2.8萬億美元，其中1萬億美元於未來兩年到期，由於疫情造就WFH習慣，令甲級寫字樓需求疲弱，目前曼克頓區甲級寫字樓空置率高達五成，或影響CMBS嘅續債能力。幸而CMBS都以長債為主，而資產價格亦於過去10年大幅上升，唔存在資不抵債問題，只係要小心空軍又無矢放的，製造恐慌。
至於港股噚日收市後傳出阿里巴巴(09988)旗下業務大整合，更有意進徰分拆旗下業務獨立上市，由於分拆有利釋放價值，阿里股價喺ADR勁升一成半，消息刺激夜期重上200大關，今日必定係裂口高開。只係阿里單係螞蟻集團上市，都玩過幾次狼來了，今次話可能分拆，當中有幾成係真，唔知幾多投資者會落搭。留意100元阻力唔少，有貨喺手何不趁機會落車套現。
至於大市仍然係反反覆覆，雖然今日預咗重上20000大關，收復20及250日線，但始終港股欠缺成交配合，向上行舉步為艱，加上期指結算，好淡大戶鬥法，暫時好友佔上風，但難保過一日兩日，淡友又板回一局，反反覆覆，大戶格鬥，散戶隔岸觀火，總好過入場作無謂犧牲，畢竟港股呢個戰場，已經唔係散戶容易搵食嘅地方。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。