阿里被罰壞消息盡出反屬好事
4月12日，部份時間多雲，日間天晴。美股上周五表現理想，道指跟標指再創收市新高，分別升297及31點；納指則升70點。總結上周道指、標指、納指分別累升1.95%、2.71%、3.12%。市場對經濟活動重啟前景樂觀，而經濟數據亦反映經濟正持續復甦。不過聯儲局主席表示，直至經濟復甦令通脹升越目標，聯儲局先會決定收水，喺貨幣政策持續寛鬆下，美股大好友認為美股升浪可延續至年底。
人家美股節節上升，但港股則死蛇爛鱔咁款，阿里巴巴(09988) 因涉違反了反壟斷法被內地當局重罰182.28億元人民幣，市場擔心下一間被重罰嘅巨型科企將會係騰訊(00700) ，唔排除喺市場憂慮其他科技亦受拖累，呢兩日港股又下試低位。估計恒指呢個星期都係喺28000至29500之間徘徊，現階段難以突破。
講返阿里巴巴被內地當局罰款後，或可消除螞蟻集團自去年11月上市「撻Q」、集團被調查等不明朗因素，或有利阿里股價企穩。事實上，今次罰款金額182.28億人仔，大約等於集團喺2019年中國境內銷售額4557.12億人仔嘅4%。呢個比例為罰款範圍1-10%嘅下限範圍，足以體現政府監管平台經濟企業嘅決心。而阿里截至2020年底嘅現金、現金等價物和短期投資金額為4560億元人仔，對其財務唔會有乜嘢實質影響，而業務模式預期亦唔會有重大改變。
而過去幾個月阿里亦全力配合調查，睇嚟同監管機構有良好溝通，即使未來三年集團仍然要市監總局提交自查合規報告，只要阿里循規蹈矩，應該問題唔大。估計今次被罰款後，阿里或可一除陰霾，對股價利好，即管睇睇股價有冇本事回補3月25日所遺下嘅下跌裂口，重上233元水平。
阿里暫時解困，但騰訊跟美團(03690) 則有機會成為下個被針對目標，如果用返罰阿里條數嚟計，假如同樣被罰收入嘅4%，對騰訊嚟講問題唔大，但相對美團仲蝕緊錢，若然被罰款收入嘅4%，都咪話唔大鑊。不過美團先知先覺，未畀阿爺懲罰之前，就不斷燒錢發展新業務，自我懲罰「承諾」未來數季繼續蝕錢，既然公司未有錢賺，又何來有機會被罰款，呢一招「自殘」避過懲罰，都算無奈。至於京東(09618) 跟快手(01024) 呢一啲，因為唔係行業一哥，喺反壟斷法嘅層面上，相對安全。
至於港股呢個星期整體表現難以寄予厚望，尤其係港匯價自開始疲弱，尤其係第一季唔少中企來港上市集資後，資金調回內地令港匯受壓，而美債息趨升亦令資金回流至美債，港股喺缺乏大量資金流入下，暫難望打破上落市格局。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。