阿里要待納入港股通方可扭轉落後之勢
2月3日，天晴，天氣轉涼，相對噚日最高27度，今日最低17度，日落之後涼好多。美股隔晚繼續反彈，三大指數升逾1%。GameStop仍然係市場焦點，不過表現跟上星期大有不同，繼周一跌三成後，隔晚再插水六成，得返90美元，相對上周高位大幅下跌逾七成。其他美國連登仔熱炒股，即係佢哋口中所講嘅YOLO(you only live once)股份如AMC跟黑莓等，全部跌到一仆一碌。
其實炒呢類「暴動股」一向唔係古天后杯茶，唔係話年紀大心血少，承受唔到咁大波幅，而係呢一種純粹因為情緒掀起資金湧入，毫無理據支持去買入一隻股，完全係投資大忌，若然只係hit and run參與短炒，必定要嚴守止蝕，一見唔對路斬立決，偏偏唔少散戶都係掃貨夠晒勇敢，但分手又唔夠狠，成日以為總有日會返家鄉，結果損失慘重。就以GME為例，當股價由高位跌穿300美元，落到200美元水平，唔少散戶認為高位回咗唔少，嗰啲位買貨應該好安全，但就完全忘記喺美國連登仔入場前，GME股價不過三十幾美元，升咗超過十倍後即使回一半，仍較起步位升咗幾倍。加上幾隻YOLO股份，基本因素差到不得了，公司經營有問題，所以先成為大戶沽空對象，雖然合眾之力，散戶將街貨掃光，確係逼使唔少沽空大戶投降平倉，但有券商為求自保，限制相關股份買賣，只准沽唔准買，再加埋監管機構助攻，打晒矛波，散戶只會被屈機。從來雞蛋都係難敵高牆，即使一道高牆(沽空大戶)被推倒，後面有更高嘅牆(監管機構)等緊你。
返嚟港股呢邊，一如古天后所料，表現仍然反覆，雖然噚日恒指一度反彈至29500水平，但收市升幅少咁截，仲要出埋陰燭，雖然日線圖上周跌至28200水平有支持，並形成島形底狀態有利反彈，但暫時喺欠缺利好消息帶動下，港股頂多係反覆上落，希望條20日線(28813)守得住，至於條10日線(29250)係爭持區域，短線大市會喺呢兩條線附近上上落落。
噚日派成績表嘅阿里(09988)業績符合預期，阿里雲表現亦唔錯，只係無乜驚喜，咁依家就係咁玩，無驚喜就吸引唔到資金入場，但以基本因素嚟睇，阿里相對其他科網巨頭真係超值，只係第二上市股份少咗北水撐腰，一旦今年放寛第二上市股份納入港股通，阿里表現料可脫胎換骨。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。