陰乾式探底前底失守不足為奇
9月21， 部份時間有陽光，初時有一兩陣驟雨，日間乾燥。美國要今晚先有議息結果，美股周一反彈後，隔晚又回復跌勢，標指無法突破阻力再度回落，市場等待今晚議息，加息已無懸念，市場更關心係議息聲明對11月加息幅度究竟有乜嘢提示。預期今晚兩點半嘅議息會議，鮑爺講話又話引起美股波動。
美國10年債息已升破2018年高位3.25%，息口已進入一浪高於一浪嘅走勢，喺通脹高企下，CPI已升至40年高位之際，10年債息只係3.5%左右，似乎唔多啱價位，即管睇睇10年債息會唔會進一步推升至2010年3.8%，甚至4%水平。息口幾時見頂係市場最為關心嘅，油價由130美元回落至80元水平左右，預期第四季金CPI亦可見頂。美聯儲局已有部署，當年底息升至4%左右，CPI料可回落至5%左右，當明年第一季CPI進一步降至4%或以下，即加息已成功抑壓通脹，息口自然見頂有望回落。
今個星期除咗美聯儲局議息，仲有唔少央行議息，瑞典央行意外地加息1%對抗通脹，喺整個歐洲能源供應短缺下，歐央行面對更大加息壓力。而美元強勢令歐元疲弱，加深歐洲通脹問題，美匯持續強勁，令全球資金流向美元區，歐洲難以避過美元荒問題，
不過喺全球其他地方正以加息對抗通脹之際，內地側有傳關可能再降準，為咗谷經濟，內地開始已印鈔去救經濟。喺降準傳聞下，A股噚日反彈，但兩市成交額只有6509億元，相當凋零，反映A股場內資金正在退場。A股雖然口口聲聲話上證要力保3100，但只係流於叫口號，無資金肯入場，上證3100久守必失，尤其人仔疲弱下，A股變得更無吸引力。
至於港股跟隨美股反彈，只不過反彈力度有眼睇，弱過藥煲，當3月恒指下試18200水平試，成交高達3000億元，好明顯有大量資金入場抄底，恒指其後便反彈至22000水平。反觀今次港股以陰乾形式一步步探底，至19000水平樓下，仍未見資金入場，可見上次抄底嘅資金，早已於反彈時套現去如黃鶴，即係已再無護底需要。之前講嘅18200國家隊鐵底，若然港股再缺乏好消息帶動，以及有資金願意入場，3月底部失守亦不足為奇。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。