騰訊今次批股未必歷史重演
4月8日，多雲，早上短暫時間有陽光，間中有驟雨。美股隔晚個別發展，標指再創收市新高，收市升6點報4079點；道指升16點，納指則跌9點。市場預期聯儲局將維持寛鬆貨幣政策，直至經濟有實質進展，以及對拜登政府所提出嘅2萬億美元基建計劃感到樂觀。大型科技股做好，美股向上動力十足，但仍要提防美股喺高位隨時要抖抖。
至於港股表現跟美股差天共地，長假期返嚟先升後倒跌，隔晚夜期跟ADR更因為騰訊(00700)大股東南非Naspers將包括騰訊在內嘅科網資產打包成嘅子公司Prosus減持1.91億股份，每股定價595元，較上日收市價折讓5.48%，是次減持涉資逾千億元，佔騰訊已發行股本2%。減持後Prosus持股量由30.9%減至28.9%。Prosus 承諾未來3年唔再出售騰訊股份。對上一次Naspers減持騰訊股份正正係三年前，2018年3月減持逾1.89億股騰訊，當時亦同樣承諾未來3年唔減持，如今限期一過即掟貨。
記得對上一次Naspers喺2018年3月減持騰訊後，騰訊股價足足需要半年時間尋底，股價由3月高位470元水平，反覆下跌至10月低位249.2元見底回升，直至去年騰訊始升穿當年南非股東減持價410元方能破頂創新高。隔晚騰訊喺ADR跌至609.28元，較上日港股收市跌20.22元，接近上月低位606元。今日騰訊唔使問梗係裂口低開，但由於市場已經歷過2018年減持，今次騰訊未必如三年前減持後，股價跌足半年方能翻身，皆因今時唔同往日，北水對騰訊嘅熱情，遠較三年前增加。作為長線投資，騰訊基本因素並唔會因為大股東減持而改變，騰訊股價如果跌至600元附近，反而係執平貨好機會。況且騰訊股價若急跌，估計北水亦會出手撈貨，古天后對於騰訊後市表現保持樂觀。
反而港股整體表現較令人失望，長假期後走勢偏弱，港匯跌至逾一年低位，A股表現強差人意，拖累恒指噚日失守20日線，加上成交無法回升，令整體動力不足，估計短期港股表現仍然反覆，估計暫時恒指仍然喺28000至29500水平之間上落，未能走出上落市格局。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。