騰訊大股東減持 一盤冷水照頭淋
6月28日，天晴，但局部地區有驟雨，日間天氣酷熱。美股上周強勁反彈後，隔晚見回吐，但回吐壓力唔大，道指跌62點；標指跟納指分別跌11點及83點。雖然美國唔少大行都認為美股仍未見今年底部，但喺半年結粉飾櫥窗效應下，呢幾日美股仲頂得幾下，但嚟緊兩個月係美企業績期，一旦業績公布未如理想，又或者公司調低今年嘅盈利預測，甚至對前景預期由樂觀轉為審慎，對美股當然會構成壓力。而10年美債息亦從3厘邊呇回升至3.2%，喺美債息高企下，亦難免防礙美股進一步反彈。
俄羅斯主權債噚日出現技術性違約，地緣政治因素係主要原因，但喺美匯指數強勢下，美元萬劍歸宗回流美國，其他地方難免出現美元荒。早前歐央行已就意大利或再現債務危機而召開緊急回議，如今俄羅斯債務違約，當然勾起市場對新興市場國家嘅債務問題憂慮。
當然新興市場債務一旦出現問題，中國亦難以獨善其身，事實上內地亦擔心美元大量流失，已多月限制美元流走。只係喺抗疫三年拖累經濟步伐之餘，內地同時決定大搞基建已穩經濟，即係內地地方政府係收入減少之際，支出反而增加，唔少地方政府負債比率閒閒地幾百個%，內地地方政府債務問題亦不容忽視。
港股喺短短幾個交易日反彈逾千點，恒指重上22000大關，當好友以為可以進一步推高恒指至4月高位，即22500水平之際，騰訊(00700)主要股東之一南非基金Naspers就一盤冷水照頭淋。舊年4月Naspers曾配股減持騰訊，並承諾三年之內唔再減持，但噚日就反口，表示會喺市場一步步減持騰訊沽貨套現，原因係公司等錢去進行回購其他投資咗嘅公司。呢個消息一出，騰訊股價噚日午後轉升為跌。
同時Naspers亦表示已於上周將之前騰訊實物派送嘅京東(09618)全數清貨套現286億元，都算好坦白，皆因其京東持股低於5%，其實係無必要公告天下，佢已沽咗貨嘅。但係Naspers持有逾兩成騰訊股份，減持不得不公布，家陣先事張揚要走佬，睇嚟係希望先自首，減低其後沽貨對市場帶嚟嘅震盪。
雖然唔少缸邊友憧憬港股連日嘅上升，恒指能重上22000水平，港股料可否極泰來，扭轉跌勢，但Naspers呢個時候打晒開口牌要減持騰訊，並已盡沽手上京東股份，擺明係走先喇，係咁先喇，話就話Naspers近年投資連番失利，等錢使要賣騰訊，但與此同時套現筆錢係要回購其他公司，呢個動作反映連大戶都覺得騰訊跟京東呢啲價已係咁上下，人哋大戶沽貨，斷估閣下唔會笨到去接貨畀人割韭菜，就算有心買騰訊或京東作中長線投資，睇嚟都要睇定啲再算。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。