騰訊持續減持科網股 美團短期難有起色
1月5日。多雲，日間短暫時間有陽光。隔晚美國個別發展，道指再創收市新高，收市再升214點；標指則跌3點；但喺債息持續上揚下，納指跌210點，科技股捱沽。雖然外界普遍預期聯儲局今年加息3次，但有大宗商品之王之稱嘅經濟學家加爾特曼警告認為，隨着新上任的成員趨向鷹派，聯儲局的加息步伐將較進取，料今年加息4次，其中一次加幅有機會達0.5厘，到年底前利率可能較目前高至少一厘。而佢更表示，當聯儲局開始收緊貨幣政策時，美股將步入熊市。不過呢位專家喺過去半年，而多次錯判美股走勢，佢亦承認錯誤，令自己失去唔少獲得更好投資回報嘅機會。今次佢強調美股唔會出現忽然崩，而係拾級而下，所以未來一兩年嘅策略會逐步減少美股倉位，以一種安靜合理嘅方式離場觀望。至於港股呢邊仍舊沒精打彩，北水回歸並未有為港股注入活力，重磅科技股繼續疲弱，只有半新股熱炒，但噚日未能高位收市，似乎已有資金食糊離場，有貨嘅要注意嚴守止賺止蝕。騰訊(00700)喺聖誕節前向股東送大禮，派送京東(09618)股份作為中期利息後，近日繼續減持互聯網持股，噚日再宣布減持Sea Limited（美：SE）的1,449萬股A類股份，按昨日Sea收市價223.31美元計，共可套現逾32億美元（折合超過250億港元）；並使騰訊於Sea的股權從21.3%減少至18.7%。連同建議之股份投票權變動，騰訊於Sea所持有的投票權預計將減少至10%以下。騰訊擬長期維持其於Sea的絕大部分股權，並將持續保持與Sea的現有業務合作關係。騰訊將受限於禁售期，在未來6個月內不可進一步出售Sea的股份。雖然騰訊短期唔會再減持Sea股份，但騰訊仍有其他大量科網股投資，市場憂慮騰訊減持行動持續，其中一個潛在減持對象為美團(03690)，睇嚟科網股短期仍然無乜運行。相反股神戰友芒格旗下公司加注阿里巴巴(09988)美股(BABA)，而阿里股價亦實在殘得緊要，估計阿里再大幅下跌風險有限，但要扭轉弱勢，暫時亦唔見有其他催化劑。相反喺息口上升下，金融股表現應該會好啲，即管睇睇大笨象(00005)有冇本事重上50元，友邦(01299)則重上80元，只係呢啲股份同時受限經濟表現，若然中港堅持清零政策，遲遲未能全面通關，重新與世界接軌，兩地經濟增長難免受限，對金融股嚟講亦唔係乜嘢好事。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。