騰訊業績難有驚喜 博炒業績前三思
8月16日，部份時間有陽光，間中有幾陣驟雨，天氣炎熱。投資者對美國通脹憂慮有所緩解，美股上周五續升，道指跟標指再創收市新高，納指亦升6點。不過周末期間，阿富汗局勢急劇變化，武裝組織塔利班正式進入首都喀布爾，並控制總統府。對於塔利班即將建立政權，各國反應不一，金融市場和投資者的焦點是東部的巴基斯坦，因為巴基斯坦擁有龐大的公共債務和相當大的股票市場。而阿富汗局勢令人不安，巴基斯坦將逼不得以喺未來幾個月或幾年內應對大量湧入難民。
除咗阿富汗局勢動盪外，本月底全球央行年會於美國Jackson Hole舉行，而聯儲局鮑爺已確認將於年會上發表講話，按以往經驗聯儲局經常會喺Jackson Hole年會作重上事項公布。而市場預期聯儲局今次喺年會上，將為縮減債券購買嘅規模及時間提供線索，不過反覆嘅疫情為此增添變數。
從唔少追蹤市場嘅指標及從統計學分析，目前資本市場大部份產品價格高昂，而喺通脹及經濟放緩影響下，預計下半年盈利增長大幅放緩，創紀錄嘅利率風險意味，即使利率僅僅小幅上升，股市嘅下跌將會令人痛苦。
睇返港股呢邊，今個星期嘅焦點，將會落喺重磅股騰訊(00700)身上，騰訊將會喺本周三收市後公布今年第二季業績，市場估計該公司截至6月底止一季反映核心業務表現嘅非國際財務報告準則（non-IFRS）純利為326.57億元(人民幣‧下同)，按年增長僅8.3%，增速按季放緩14個百分點。
騰訊曾預告投資增加或令盈利「零增長」，市場憂慮內地加強對網遊監管或對整個行業生態帶來長期改變，影響遊戲用戶粘性與生命周期等，故相信騰訊業績前後嘅反彈力度均有限，有意買入騰訊博業績前要三思。中資新經濟股喺監管風暴下受壓，令港股表現持續不振，後市港股料繼續跑輸環球股市，而恒指指數於27000至27200點阻力甚大，喺政策市陰霾下，估計仍然係新能源及電動車股較受資金歡迎。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。