騰訊派成績表 成敗左右大市表現
5月17日，部份時間有陽光，有幾陣驟雨，日間酷熱。美國經濟數據好壞參半，反而令市場憂慮通脹升溫情緒有所舒緩，美股上周五反彈，道指跟納指反彈逾1%；納指更反彈逾2%。總結全星期，道指、標指、納指分別累跌1.14%、1.39%、2.34%。納指連跌四個星期，為去年3月以來首次。
聯儲局理事繼續安撫市場對於通脹升溫嘅不安情緒，表示雖然通脹高於2%水平嘅情況，可能會維持到2022年，但呢種情況唔太可能長期存在，更強調唔會對通脹暫時上升做出過度反應。聯儲局喺一星期內已有三名官員出嚟派定心丸，希望向市場傳達聯儲局唔會貿貿然閂水喉嘅訊息。聯儲局唔會咁快收水，美股應該可以定返啲。
美股能否解除對通脹升溫嘅威脅，係影響美股後市走勢嘅關鍵，至於港股上周五ADR反彈，夜期亦重返二萬八水平，只係港股缺水問題仍未解決，資金唔願而流入港股，即使北水上周已再見淨流入，但流入速度及數量相對年初已大為失色，未有新資金流入，港股喺塘水滾塘魚下，即使守住二萬八水平之上，28200至28600呢個裂口，要成功回補亦唔容易。
上星期美團(03690)跟阿里(09988)已派成績表，表現未如人意，尤其兩者嚟緊一段時間為咗業務發展，都要投放大量資金，未來兩年盈利自然收入再多，純利都難見大幅增長。今個星期論到騰訊(00700)派成績表，而騰訊喺多個指數舉踤輕重，港股今個星期表現可以話成也騰訊，敗也騰訊。
京東集團(09618)分拆旗下京東物流(02618)上市，今個星期招股，話晒京東係大牌子，京東物流已成功引入唔少大孖沙為基礎投資者。睇返招股文件，京東物流2020年虧損按年擴大至40.37億元人民幣(下同)，2019年蝕22.37億元，主要受可轉換可贖回優先股公允價值變動所影響。若撇除有關部分，錄得經調整盈利17.09億元，2019年同期經調整虧損9.24億元，並預告將於2021年錄得重大經調整虧損。即係京東物流又係未有錢賺嘅上市新丁，年初當大家集中以市銷量去考量新經濟股之際，呢類股份當然火熱，但當通脹升溫不利高估值板塊嘅情況持續，預期京東物流上市亦難再掀起新股熱潮。
而本周另一焦點，將會係恒指服務公司周五再作季度檢討，並將首次反映諮詢結果，即係將恒指成份股數目逐步增加，以達最終100隻固定數目。按進度預計今次季檢或先增加5隻恒指成份股至60隻。雖然數目有所增加，唔代表本來嘅成份股無機會被剔出，至於今次有機會被染藍嘅逾千億市值股份唔少，古天后無水晶球，實難預測結果，但講到市場熱門心水則有李寧(02331)及華潤啤酒(00291)，至於京東(09618)跟快手(01024)亦屬市值高而流通量足夠嘅股份。留意騰訊跟友邦(01299)則面臨削減權重，而阿里跟美團則有望上調權重。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。