騰訊着眼元宇宙發展 今季業績稍遜無有怕
11月11日，天晴，非常乾燥，早晚較為清涼，日夜溫差較大。隔晚美股回軟，道指跟標指分別跌240點及38點，納指跌幅更超過1.6%，跌263點。最新數據顯示，美國10月消費物價指數(CPI)按年升6.2%，高於預期嘅5.9%，為自1990年11月以嚟最大升幅；按月升0.9%，亦高於預期0.6%。扣除食品跟能源嘅核心CPI按年漲4.6%，按月升0.6%，亦分別高於預期4.3%及0.4%。由於數據反映通脹升溫，美國債息急升，10年期美國國債孳息率周三升逾12個基點，至1.575厘。
喺通脹升溫下，引發市場可能提早加息憂慮，不過耶媽又出嚟派定心丸，預期通脹會喺明年底前完結，並重返約2%嘅目標通脹水平。耶媽表示，當疫情完結，將會有更多人重投勞動市場，消費者需求亦會重返正常情況，現時面對嘅薪金及商品價格壓力將會得到釋放。若然情況有變，聯儲局會出手，唔會容許1970年代通脹瘋狂急升嘅情況重演。而美國聖路易斯聯儲銀行行長預計，聯儲局明年將加息兩次，不過呢個預測只係基於目前經濟情況而定，若然明年上半年情況有變，佢嘅觀點亦會隨之而變。而呢位行長一向被視為鷹派人物，佢開得口咁講，明年加息兩次似乎走唔甩。其實美國明年加息已無懸念，只係視乎通脹如何發展，睇返家下10年期債息仍未升至今年高位，美股回調正常，又唔使太過擔心。
至於港股ADR及夜期偏軟，二萬五關得而復失，市場關注騰訊(00700) 股價及相關新聞 業績，集團上季收入按年增速跌至上市以嚟最低位。面對業務增速放緩，管理層喺業電話會議上當然要畀啲未來增長亮點投資者，呢期梗係嚟唔開至hit嘅元宇宙概念。騰訊總裁劉熾平表示，元宇宙可以為現有的產業帶來額外價值，如遊戲可以借此加強互動性；社交網絡則可容入遊戲性。而騰訊擁有相關技術，知道點樣去建立一個虛擬世界，並且具備工程、人工智能(AI)、遊戲及數碼經濟方面嘅知識及能力。不過講到天花龍鳳都好，始終都係一個概念，今次呢份業績，難免令股價短期有啲腳軟。
不過技術走勢方面，騰訊喺450元水平似乎已見咗底，即使有唔少大行因應呢份業績而調低其目標價，但大部份目標價都仍然喺600元水平，只要騰訊企得穩條10日線472元，又唔使睇得太悲觀。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。