騰訊阿里開放生態系統或被視為另類壟斷
7月16日，大致多雲，短暫時間有陽光，間中有幾陣驟雨，局部地區有雷暴。投資者正評估新一輪企業季度業績嘅同時，亦正思量聯儲局不同官員對通脹嘅睇法言論有所分歧，美股個別發展。道指升53點；標指跟納指則分別跌14點及101點。目前聯儲局不同官員對通脹發表言論鷹鴿難分，呢個時候財長耶媽喺接受外煤訪問時，警告未來數月美國通脹將急劇升溫，令市場有所避忌。耶媽話通脹升溫唔會係一個月就結束，不過通脹喺中期通脹將向正常水平回落，但仍需密切關注形勢發展。幸而耶媽指目前美國跟2008年爆發金融危機前有所不同。
即使美國暫時未有收水，不過其他央行已先着手縮表，新西蘭維持指標利率0.25%不變，將在下周五前停止大規模資產購買計劃下的額外購買。加拿大央行維持利率不變，但也宣布縮減購買國債規模由30億加元減至20億加元。至於中國公布第二季經濟增長為7.9%，符合市場預期，同日遺係降準實施生效日。 中央已先表明貨幣政策以穩健為首要，唔會大水漫灌，內地股市指數表現牛皮。近期互聯網巨企見企穩，中央批准騰訊控股(00700)收購喺美國上市嘅搜狗，令市場氣氛鬆一鬆。同時騰訊跟阿里(09988)有意互相開放生態系統，以應付監管機構嘅反壟斷指控。
兩大巨頭做啲嘢向阿爺表態，願意配合反壟斷整改，不過阿爺心意難測，兩者互相向對方開放生態系統，會否被指為強強聯手，窒外市場其他競爭者生存，同樣可被視為一個聯合壟斷行為，阿爺點解讀真係連水晶球都未必知。基於有關監管法則、罰則仍未明朗化，平台股呢期都係趁反彈減磅，短期都係有波幅，冇升幅。
話咗ATM短期無運行，四大藍籌科企，只有小米(01810)較為安全，市場分析公司Canalys公布第二季全球手機出貨量數據，當中，三星成為全球手機出貨量最大品牌，該牌子的手機在第二季出貨量按年增加15%，佔全球市場佔比19%。小米集團(01810)的手機銷量超越了蘋果公司(Apple Inc.)，前者銷量按年急升83%，市佔率17%，躍升為銷量亞軍；蘋果公司，銷量按年僅升1%，市佔率14%，跌至第三名。由於小米手機較面向大眾，其手機平均售價分夠較三星和蘋果公司便宜約40%和75%。不過小米已表示將增加高端設備的銷量，例如Mi 11 Ultra，料有助提升整體毛利率。睇返小米呢期股價表現都係咁上下，28元阻力唔易突破，26元叫做有唔錯支持，唯有喺呢個range裡面炒住上落先，要有更重大利好消息，小米先有本事進一步向上突破。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。