高增長股第三季可持續向好
6月29日，間中有幾陣雨，早上局部地區有雷暴，日間部份時間有陽光。隔晚美股個別發展，道指跌150點；標指跟納指再創收市新高，分別升9點及140點。大型科技股做好，社交媒體Facebook獲美國聯邦法院駁回聯邦貿易委員會(FTC)反壟斷訴訟，刺激該公司股價急升4.18%，創收市新高，市值首次超過1萬億美元。另外，蘋果公司、亞馬遜、Netflix全日均升逾1%。晶片股表現亦突出，普遍升幅超過2%，SunPower更升11.81%。
雖然聯儲局於6月中嘅議息會議中，提前咗加息時間表；但經濟仍然復甦中，對股市係利好因素，美股喺下半年仍有機會續創新高，只係間中亦可能出現震盪。眨下眼上半年過去，今日係6月份期指結算，而明日就係半年結，睇返過去半年，最大升幅嘅藍籌股，係累計升咗68%嘅中石油(00857)，全因市場相信喺經濟復甦下，對石油需求回升，而OPEC未見大幅增加產量，令油價半年以嚟持續走強。至於藍籌累計半年最多係海底撈(06862)，6月個股價跌咗37%，主要係公司人事變動所致。而藍籌之中跌最多嘅頭五名，除咗海底撈之外，另外兩新貴阿里健康(00241)跟信義光能(00968)分別跌20%及18%，僅次海底撈後面，難怪有口痕友話染藍未必係好事，反而係股價走弱惡夢嘅開始。
展望下半年，喺疫苗接種進度加快，防疫措施有望逐步放寬，而港府將於7月登記發放電子消費券下，第三季股市應該有啲起色。當然係疫情唔好因為變種病毒又爆第N波，否則經濟真係有排唔使翻身。由於通脹持續升溫，聯儲局開始由鴿轉鷹，不過口吻開始轉鷹，都係一種期望管理，先畀市場有心理準備，但實際加息最快都要明年下半年，所以古天后認為第三季股市有得炒。
之前由3月開始調整足足三個月嘅高增長股，因為殺估值而累計跌咗唔少，去到6月份，呢類股份開始止跌回升，當中醫藥及醫械股，更有唔少股份屢創新高，反映市場資金從新投入高增長股。而事實上，喺通脹升溫，但息率仍未上調之際，要抵抗通脹，高增長股應較傳統股更勝一籌。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。