鮑爺未敢大放鷹 股市下半年仍有運行
6月23日，多雲，間中有驟雨，雨勢有時頗大及有狂風雷暴，唔穩定天氣將持續至周末。話就話聯儲局貨幣政策開始由鴿轉鷹，不過隔晚主席鮑爺言論傾向溫和，帶動美股隔晚做好，納指更再創收市新高。道指跟標指分別升68點及21點；納指則升111點。鮑爺喺周二聽證會表示，美國家庭開支快速增長，住宅市場及商業投資活動均穩健地復甦，相信主要係得益於經濟開放、財政支持，以及寬鬆嘅金融條件。鮑爺拍晒心口話聯儲局唔會先發制人地加息，必要時會動用工具，以便引導通脹回落至2%。
科技股表現理想，雖然有議員提供反壟斷法案，可能迫使網購巨人亞馬遜拆售物流服務部門，但亞馬遜股價周二仍升1.49%。其他科網股亦見資金追捧。不過繼續有分析指美股將見頂回落，景順首席全球市場策略員胡珀警告美股或出現10-15%回調，不過跌市提供買入機會，經濟復甦強勁將支持股價迅速復甦，並稱一旦股市下跌8至10%，便會買入。即係美股就算出現調整亦可以淡定面對。
至於港股相對美股就弱得多，繼續跑輸唔使講，主要係港股受A股影響較大，搞到港股繼續唔上唔落，一直喺區間移動，遲遲未見突破。不過經過一個唔太窮嘅五月，而六月又未見太絕，恒指呢幾個月一直喺27500至29500之間上落，喺區間內已游走一段時間，但古天后相信終於大市會走出呢個區間，進入一個單邊行情。只要美股仍未出現深度調整，A股無大礙嘅情況下，古天后傾向相信大市向上突破機會較大，尤其半年結粉飾櫥窗效應，呢個月底表現唔會太差，而下月係建黨100周年嘅大日子，維穩係指定動作，斷估A股唔會無啦啦質落去，港股亦少咗一重顧慮。
近日科網股有回勇跡象，而相關企業成績表亦叫交到功課，經過整整一季殺估值後，整個科網板塊，以至其他高增長股，估值已回歸合理水平，而市場亦已逐步消化內地對科技股嘅監管，科技股逐亦回升只係時間問題。目前港股面對最大風險，仍然係中美之間爭拗，而美國對中國企業嘅制裁，未見喺拜登上場後放鬆，反而喺美國經濟回穩下，預期下半年華府將續向中國施壓，或影響投資氣氛。即使古天后對港股下半年走勢仍傾向樂觀，但政策市總係吹無定向風，始終未宜過份進取，只能繼續步步為營。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。