7月急跌後反彈 8月中更為凶險
7月29日，大致多雲，有幾陣驟雨，局部地區有雷暴，下午短暫時間有陽光。隔晚美股三大指數升跌不一，道指跌127點；標指亦微跌不足1點，但係納指升102點。聯儲局維持貨幣政策不變係意料中事，重申通脹上升只係暫時性，不過鮑爺承認通脹或比預期更高更持久，美國經濟已朝向縮減量化寬鬆嘅目標取得進展。美企繼續業績期，多間公司派成績表，都能夠交出一份幾靚嘅成績表，只係好似Facebook咁，賺多一倍但警告收入增長放緩，股價盤後腳軟。
至於港股果然係落到24800至25000左右反彈，中港股市急跌後，有消息指中證監周三晚上跟大型投行高層召開網上會議，試圖緩解市場對監管政策的憂慮，大派「定心丸」。而內地官媒亦連番強調，A股唔存在系統性風險，並指金融市場嘅短時波動難以持久，外資增持人民幣資產嘅大趨勢唔會改變。不過你有你講，但古天后認為外資確實係怕咗內地接二連三出招，尤其係朝令夕改，政策變化難以捉摸，港股急跌後若出現報復式反彈，唔排除資金趁反彈進一步減磅。
7月份港股下跌主要受到內地反壟斷法、數據安數據安全法、消費者權益保護、房地產過度借貸等等密集政策所影響，而並非由任何系統性金融危機或經濟倒退而觸發跌勢。經過呢幾日急跌，阿爺又出口派定心丸，喺嚴重超後，8月初或持續反彈，只係月中要更加小心，皆因全國人大常委會將於下月17日至20日喺北京舉行，有消息指會議議程包括提請審議全國人大常委會關於增加《中華人民共和國香港特別行政區基本法》附件三所列全國性法律的決定草案議案，即常委會審理全國性法律在香港實施的安排。有建制派相信，涉及的法律應為內地《反制裁法》。內地早前通過《反制裁法》，禁止執行外國制裁，當時未提在港澳落實安排，有建制派早前稱，可將法例納入《基本法》附件三，以在港執行。若然《反制裁法》喺香港實施都咪話唔頭痕，皆因在港企業屆時究竟跟隨美國對制裁人士繼續實施制裁，定係跟返中國嘅《反制裁法》，唔可以執行外國制裁呢?? 相信呢個就係之前美國警告在港美企，喺香港經營業務需要面對嘅風險之一。
總而言之，喺中美角力及內地政策難以捉摸下，港股更加變化莫測，即使噚大市喺24800點見底反彈，亦未宜重鎚出擊，目前只能繼續輕倉，多做短線操作，一見唔對路要試跳車逃生。千祈唔好期望市場會有好大力度反彈，尤其恒指失守250日線27200左右，可能就係今次嘅反彈目標，指數移動區間已下移，缸邊友都要面對現實。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。