呢隻手設股隨時又翻炒
拜登明年入主白宮已無懸念，不過一直未認輸嘅侵侵用僅餘短短個幾月嘅任期繼續「做嘢」，噚日傳聞指侵侵再出招，準備將中芯國際（981）及喺南海參與勘探嘅原油生產商中國海洋石油（883）等4家中企列入「黑名單」，限制美國人投資。消息一出又嚇到港股腳軟，恒指打個冷震跌咗553點。投資者擔心禁止美國人投資「名單」內，喺香港上市嘅中國企業料涉數以千億元計資金，恐怕短期內引發走資潮。
不過噚日港股成交高達2400億元，並唔係放量成交跌市，當中近900億元成交係因應MSCI指數今日起有新變動，噚日只係追蹤相關指數基金進行re balancing，所以只會喺收市前成交急增，唔使大驚小怪。暫時真係搵唔到任何引發股災嘅理由，但利好因素又消化得七七八八，估計港股暫時可能喺26,200至27,000之間上落。
個股方面，留意到噚日唔少科技股都腳軟，比亞迪電子（285）係少數逆市上升嘅科技股。公司已公布其第3季業績，雖然公司今年首3季業績表現亮麗，但公司提供嘅2020全年收入指引為700億元至750億元，純利料為50億元至55億元，指引不達券商預期，業績公布後股價持續下跌。公司股價由45元水平回落至最低31.9元，喺35元水平已整固咗一段時間，沽壓收歛並消化，而股價亦重返多條移動平均線之上，只要成交配合，有望重現升勢，現價買入，目標為前高位45元，跌穿36.2元止蝕。
筆者為證監會持牌人，未持有上述股份財務權益
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。