呢隻舊經濟股算係可取
美國疫情持續惡化，雖然市場將希望寄託喺疫苗上，但疫苗效果如何仍有變數，加上英國脫歐貿易談判接近破裂，美股隔晚個別發展，納指一枝獨秀再創收市新高。港股噚日打冷震，主要係有消息指美國再制裁12名中國官員，而消息於噚晚已經證實。雖然今年受疫情影響，環球股市喺第一季下跌，但其後股市反彈，尤其新經濟股累積升幅巨大，年底有缸邊友計數獲利離場亦好正常，稍有消息就成為沽貨藉口。
而近日資金喺新舊經濟股之間穿梭，資金沽新經濟股獲利，並流入舊經濟股，但並非所有舊經濟股都買得過，而肺炎疫情下推動個別行業加快整合，中國聯塑（2128）定價能力較強，係值得留意嘅舊經濟股。
因應市場需求增長，聯塑對生產積極擴大產能，目前可實現285萬噸產能，相較於2019年底增加咗7萬噸。同時聯塑亦積極拓展海外市場，當前重點聚焦於東南亞多國，配合國家「一帶一路」倡議。聯塑近年響應國家環保號召，力拓環保市場業務，未來計劃喺廣東省雲浮市興建年處理能力45萬噸嘅廢物處理中心，進一步鞏固及擴大市佔率。
預期聯塑將迎來估值重評，主要係下半年展望改善；今年上半年內地汛情嚴重，內地政府料提高雨水渠系統嘅基建預算，膠管需求進一步提升。集團擴大產能規模，將為其未來業績增長提供動力，值得留意。
本人為證監會持牌人，未持有上述股份財務權益。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。