龍源電力估值仍然便宜
港股周一續升，但就未能企穩二萬八點，隔晚美股回吐，納指跌勢較顯著，愈嚟愈多市場專家表示市場情緒亢奮，投機有過火迹象，呼籲大家要小心。古天后都同意喺魚缸搵食，行走缸湖幾時都要步步為營，要有心理準備堅離地嘅美股隨時出現較大幅度調整，但硬係要將調整講到股災，又點都講唔通，總之面對瞬息萬變嘅市場，任何時候都要保性警覺性，但又唔需要過份庸人自擾。
新能源股噚日顯著回吐，但正好畀投資者提供咗上車機會。由於內地「十四五」規劃對於包括太陽能及風電嘅中長綫發展尤其重視，亦提到國內需要喺2060年達至碳中和，利好中資再生能源股。而內地新能源嘅海外企業拓展步伐維持穩健，當中龍源電力（916）喺南非嘅項目亦實現風電產業鏈「走出去」目標，相信喺政策支持下，未來甚具增長潛力。
作為內地新能源營運龍頭企業，其價值尚未被市場充份發掘，考慮到「碳中和」目標及平價時代已到來，進一步打開新能源營運空間，龍源電力可持續「跑贏行業」。龍源電力已通過計劃中嘅A股上市潛在注入高達15吉瓦(現有投資組合20吉瓦)資產；其次中央政府可能支付逾期補貼，金額相當於集團市值三分之一；加上內地推出全國碳交易可能帶來額外收入；而最後亦係最重要嘅因素，係內地未來強勁嘅緣色項目，料至2025年達20吉瓦。
龍源電力估值復甦只係剛剛開始，政策利好推高行業景氣度、現金流改善邏輯逐步獲得認可，推動公司估值回歸1倍市賬率，資本回報率約10%，與其2015年前嘅1.5倍至2倍市賬率、太陽能企業平均3.5倍，以及環球同業6倍PB比較，龍源電力現價極為吸引。
本人為證監會持牌人，未持有上述提及股份財務權益。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。