平台股趁反彈減磅 短線走勢仍反覆
隔晚美股三大指數再創新高，今日港股終有啲起色，除咗美股憧憬嚟緊業績期，標指成份股都交到功課，今早內地公布6月出口數字好過預期，帶動港股反彈，噚日唔夠力水，今日儲夠力，成功重上二萬八大關。
恒指高開178點報27694，升幅曾收窄至97點，見27612點半日低位，不過內地公布進出口數據好過預期，帶挈恒指重上兩萬八及10日線(28035)，升幅曾擴大至537點，見28052點半日高位。恒指中午報28027點，升512點或1.8%；國指升214點，報10159；恒科指升204點，中午報收7718點。不過半日成交額883.56億元，又未算完全配合升勢，升勢較集中喺幾隻重磅科網股。
藍籌股普遍向上，大笨象(00005)跟友邦(01299)半日分別升1.7%及2.7%，內銀股跟內險股亦有進帳，只係升幅較溫和，普遍不足1%。至於北水呢幾日持續買入嘅吉利(00175)，細摩出嚟唱好，半日股價升5.2%，跑贏其他汽車股。
雖然科網股仍受監管風暴所困擾，但嚴重超賣後反彈好正常，旗下鬥魚及虎牙雖不准合拼嘅騰訊(00700)，剛獲批收購搜狗，股價借機彈返5.1%。美團(03690)跟阿里(09988)半日亦分別彈5.5%及4.6%，前者300阻力爭持，後者總算企返穩200元。字節跳動攔置上市計劃，主要競爭對手終搵到個理由反彈，今早創上市新低後拗腰急彈，半日升一成。其他平台股普遍反彈2%或以上。不過監管風暴沒完沒了，喺未有確定罰則前，呢類股份都係有波幅，無升幅，重貨嘅好趁反彈減一減磅，否則彈完又落資金又被鎖死。
光伏股又落鑊，二線光伏股更得資金歡心，陽光能源(00757)大升11.8%；協鑫新能源(00451)急升10.2%；不過協鑫同系保利協鑫(03800)復牌無期，就算協鑫新能源落鑊，都唔會打動到阿Man嘅投機心。信義系亦有追捧，新能源股中，阿Man對玻璃股較有信心，信義玻璃(00868)創新高，福萊特(06865)半日亦升3%。
新豐泰(01771)發盈喜指中期業績勁賺3.7倍，股價半日升近三成，之前阿Man提介過嘅永達汽車(03669)及美東汽車(01268)亦創新高，分別升8.2%及7.2%，龍頭中升(00881)曾經喺直播節目推介，同樣創上市新高。對於呢啲4S汽車股，阿Man認為可以訂個止賺價繼續持有，話咗穿頂唔估頂，一日唔轉燈都唔急住落車。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。