美國又玩制裁 市場信心薄弱
人家美國議息唔太鷹，結果噚日美股三大指數回升，美股仍然欣欣向榮，相返港股就死下死下，皆因美國再對中資企業進行制裁，總統拜登簽署一項新行政命令，對中國四家藥企實施制裁，港股今日再下跌，更創下近15個月低位，恒科指則盤中創新低。
恒指低開132點報23287，跌幅曾縮至37點，見23383半日高位，但恒指連跌四日累跌834點，沽壓未見沽減少，更跌穿11月30日23175點低位，最多跌265點，低見23155，創去年9月25日以來低位，之後跌幅收窄至兩百點內。恒指半日收報23231，跌189點；國企指數報8250，跌92點；恒科指一度低見5681創新低，挫2%，半日收跌83點，報5712。跌市大市半日成交751.2億元，呢幾日淡靜嘅市況中，呢個半日成交額算多。
藍籌股普遍下跌，其中比亞迪(01211)跌足七日，半日再跌2.5%，睇嚟100日線(約237.7)失守後，大大力劏牛，雖然265-269牛證重貨區已陣亡，但打後到250都係重牛區，今日比亞迪若然唔識彈返上100日線，睇嚟啲重牛都凍過水，要落到240-250先有支持。友邦(01299)跟平保(02318)微彈，齊齊彈返0.6%，但銀行股就跟市跌，跌0.5%嘅大笨象(00005)，跌勢算溫和。
內地對科網股監管沒完沒了，內地有報道指，因質量監管缺失，京東(09618)、阿里巴巴(09988)旗下淘寶及拼多多遭約談，京東半日跌近半成，藍籌之中跑第尾。其他科網股亦腳軟，ATMX無一倖免，小米(01810)半日跌1%，失守18元重要支持位。騰訊(00700)、阿里(09988)跟美團(03690)分別跌1.9%、2.7%及4.1%。其他中概科網股亦走弱，半日跌0.2%至超過半成不等。
內房及物管股反彈，彈得最勁係之前仆得最直嘅奧園健康(03662)，半日升近一成，其他內房跟物管股普遍反彈1%至不足5%不等。煤炭股係今日較亮眼嘅板塊，兗煤(01171)公布發展戰略綱要，中午狂升近兩成，中煤(01898)亦升一成，反而最大隻嘅神華(01088)，半日只係升左3.7%，煤炭股之中升得最少。
噚日一個制裁傳間炸爆咗大部份生科股，當中藥明生物(02269)收市跌近兩成，堂堂藍籌股單日咁嘅跌幅，認真失禮。不過公司宣布啟動回購計劃，斥資5億美元回購股份，並指公司營運一切正常，股價半日彈逾6%，喺生科股中彈力算唔錯。雖然暫時未見香港呢啲上市嘅生科股被正式列入制裁黑名單，不過家陣投資信心薄弱，一個半個壞消息，啲股份就食咗瀉藥咁，難怪今日反彈，見唔少散戶趁機逃生。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。