三孩概念股只宜低吸勿高追
隔晚美股假期，港股都係睇住內地股市嚟玩。港股今日反覆向好，恒指高開7點，報29159，其後倒跌115點，低見29036；但財新5月PMI好過預期，大市止跌回升，最多升178點，高見29329，臨近午市升勢放緩，最終恒指半日收報29275，升123點；國指中午報收10933，升44點；恒科指跑贏大市，半日升177點。雖然呢幾日港股已成功企穩喺29000水平，可惜沿路上嚟成交都未係好配合，今日半日都係得816.5億元。
藍籌個別發展，金融類股份逆市下跌，除咗大笨象(00005)跌少過1%，其他中資金融股都逆市跌1%或以上，不過友邦(01299)先低後高，半日倒升0.6%。有大行調低申洲(02313)評級，股價半日跌4.5%，藍籌股中跑第尾。
科技股做返好，雖然通脹威脅仍喺度，但美國債息無再升，近日回穩，令資金再度流入增長股。留意返美國個人消費開支物價指數(PCE)喺4月創29年最大增幅，今年內都會高企，通脹數字明年會因財政刺激的邊際作用下降，以及供應逐漸追上需求而減退，商品價格未來半年至一年內亦1會緩和，但係通脹憂慮仍會加劇股市波動性，唔好太過大安旨意。反而阿Man最擔心係實質經濟增長步伐，追唔上通脹速度，演變為滯脹，咁就大件事。不過內地有基金認為雖然科網股，尤其平台股短線仍受行業監管陰霾困擾，但隨住5G、新能源、科技、供應鏈本地化等多個長線結構性機遇，中資科網股中長線仍有不俗投資價值。只係唔好過份樂觀以為年初狂牛光景再現，相關科網股只宜趁調整吸納，不宜高追。
至於噚日爆升嘅三孩概念股普遍回吐，但呢個概念仍有炒作空間，龍頭股錦欣生殖(01951)業績亦大有改善，今年或有被重新估值機會，可於21元以下吼位上車，跌穿20元止蝕，博上面再破頂。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。