中國讓步符美審計準則 中概股終可鬆一口氣
上周五中國表示考慮只要唔涉及到國家信息安全，將會喺審計方面積極配合，畀美國監管人員有權限查閱大部份喺美國上市嘅中資公司所有審計底稿，呢個消息帶動周五晚中概股跟美股做好，反映中概股表現的金龍中國指數上升4.7%。而港股喺上周五拗腰重上二萬二關後，今日繼續做好。
恒指高開187點，早段升幅曾收窄至84點，見22124半日低位，其後升幅再度擴大，口痕友話因為疫情記者會上，有利好消息，恒指半日最多升352點，見22391半日高位，其後時間喺高位徘徊。中午恒指報收22313，升274點；國指升143點，報收7680；恒科指升134點，報收4659。由於北水休假，半日成交額只有504.1億元，估計今日都係買賣兩閒。
藍籌股表現唔錯，ATMXJ全線向上，阿Man一向最睇好京東(09618)，半日京東升5.6%，跑贏其他四隻重磅科網股。騰訊(00700)、阿里(09988)跟美團(03690)分別升1.7%、2.1%及3.1%，小米(01810)表現仍然最落後，半日升唔夠1%，14元呢個阻力遲遲未破。啤酒股今日表現麻麻，百威亞太(01876)半日跌3.1%，成為表現最差藍籌。本地銀行股亦有少少腳軟，但保險股表現則較突出，平保(02318)半日更升4%。
阿Man亦提過，內房股最壞時間已經捱過，雖然上周五多隻內房股因為未能如期公布業績而停牌，但浙江省衢州市發布《關於促進市區房地產業良性循環和健康發展的通知》，衢州成為內地第一個限購和限售均取消城市。市場憧憬內房政策將逐步鬆綁，今日內房股發力。但由於唔少內房股停咗牌，資金轉去炒作物管股，碧服(06098)半日升12.4%，成為藍籌股升幅冠軍。至於阿Man一直睇好嘅碧桂園(02007)，半日升逾7%，重上6元水平。阿Man喺上月中大跌市其間，建議4元樓下買入碧桂園，以當時最低3.4嘅低位計算，現價已升逾八成。雖然短短兩周有如此可觀升幅，但阿Man並唔急於食糊，有信心係稍後時間，股價可以重返7元之上。
比亞迪股份(01211)上月新能源車銷售增長強勁，同時宣布汽油車將逐步停產，股價半日升逾5%，留意240阻力唔細，企得到240就有機會挑戰260元，否則可能又喺220至240之間上落。理想汽車(02015)跟小鵬汽車(09868)，仲有蔚來(09866)中概股審計陰霾漸除，三股分別升4.8%至7.4%不等。觀乎資金喺呢個板塊嘅流向，似乎都隻中喺呢幾隻電動車股上，傳統嘅汽車股如吉利(00175)及長汽(02333)等，已久久乏人問津。
麥狄文利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。