五月開谷未如理想 恒指二萬八不容有失
承接上周五跌勢，港股5月開局好運滯，半日再跌逾400點，仲要失守100日線，睇唔見開胃。恒指低開64點，開市後跌幅雖曾收窄至40點，見28684點半日高位，其後沽壓增加，大市跌勢加劇，恒指跌穿100日線(28548點)，最多半日跌468點，見28256點半日低位，創3月29日以來新低。恒指中午報28300點，跌424點；國企指數報10686點，跌138點；恒科指跌108點，報8204點。唯一慶幸係半日成交額只有538.47億元，跌市成交未見顯著增加。A股五一假期休市，北水暫停，令本來缺水嘅港股更為乾塘。
藍籌金融股跌到一仆一碌，大笨象(00005)半日跌3.4%，藍籌之中包尾，阿Man從來都唔會馬後炮，一早講咗大笨象喺48至50元阻力極大，過唔到就係過唔到。友邦(01299)半日跌2.6%，希望能守住95元，守得住應該死唔去。內銀股及內險股亦腳軟，普遍跌1%或以上。藍籌中只有兩隻逆市企穩，中石化(00386)半日升0.5%，已經係藍籌之中表現最好。
內地仍放緊五一假期，多隻之前已預先落鑊炒定先嘅五一概念股，今日反而受壓跌勢顯著，雖然有分析指五一檔期電影票房可創新高報捷，但影業股急挫，IMAX中國(01970)半日跌一成；貓眼娛樂(01896)跌8%，稻草熊(02125)挫12.3%；出行股方面，復生旅遊(01992)跌6.5%，攜程(09961)跌3.4%，同程藝龍(00780)守住19元已算硬淨。再一次引證炒概念股跟炒消息股一樣，都係事前炒定，事後玩完。
濠賭股情況差不多，雖然澳門4月博彩毛收入84.01億澳門元，按年增長10倍，但略低於分析員預測中位數。濠賭股早喺五一假期前已顯得乏力，今日跌勢持續，整個板塊跌1%至3.7%不等。
雖然大部份股份今日表現麻麻，但醫美股繼續走強，瑞麗醫美(02135)再創新高，半日急升近24%，其他醫美股閒閒地升幾個子。以發展疫苗及醫治肺炎相關藥品有關嘅醫藥股表現最為突出，板塊內股份升幅由4.4%至近一成不等。除咗醫美股之外，二線手遊股表現亦突出，不過小心呢個板塊升得急亦回得快。
留意五窮月開局又確係幾窮，暫時恒指已失守多條移動平均線，留意嚟緊幾日，28200至28000不容有失，若然恒指失守二萬八大關，港股或下試二萬七水平尋找支持。相反二萬八關守得住，區間移動嘅日子將繼續，上落區間或重演上月28000至29500之間。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。