京東健康係時候落車將錢袋
美股隔晚反覆，雖然英國變種病毒令傳播失控，令美股早段插水，但新一輪9000億美元財政紓困方案感到樂觀，美股先跌後回穩，道指更由最多跌423點轉倒升收市；標指跟納指則收窄跌幅，收市分別僅跌14點及13點。至於港股一直落後美股，隔晚歐美股市震盪令恒指夜期一度失守二萬六關，大家都要提高警覺；阿Man再強調一次，只要大市能夠守住二萬六關，基本上都仍然行緊range。只不過相反失守二萬六咁就大鑊，再穿埋50日線大約係25800水平，最低消費要落到25000先有支持。不過港股已一段時間炒股唔炒市，而阿Man喺年中已經提過，今年嘅主旋律係炒股唔炒市，資金喺唔同板塊之間輪動，指數上落反而唔需要太在意。
恒指低開45點報26260，早段曾跌102點，見半日低位26204點，其後曾倒升58點，見半日高位26365點，上下波幅只有160點，長假期前預咗偏向淡靜。恒指半日跌22點，報26284；國指跑贏升44點，報10446點；恒科指升52點，半日報收8212點。
藍籌股各自發展，友邦(01299)半日跌1.1%，但大笨象(00005)先跌後回穩，半日倒升0.2%。其他重磅藍籌股，以安踏(02020)表現最好，半日升5.2%，集團持有52.7%股權合營公司AS Holding旗下之Amer Sports Oy出售Precor集團，套現3.6億美元(相當於約28.02億港元)，市場對安踏呢個舉動反應都正面。小米(01810) 跟舜宇 (02382) 半日分別升2.1%及3.1% ，騰訊(00700)升0.2%。
阿Man之前講過內需股可以睇高一線，今日除咗安踏之外，好多內需股都有資金追捧，仲要逆市創埋新高，包括半新股泡泡瑪特(09992)、阿Man今年愛股之一嘅思摩爾(06969)，仲有上兩個星期阿Man喺收費聊天室推介過嘅敏華(01999)等等。不過汽車股今日就回吐，唔知同有消息指蘋果公司計劃推出電動車Apple Car有冇關係。不過阿Man 一向係樂觀而積極嘅，新競爭者加入，未必一定對行業有負面影響，反而將整個市場做大做強，對行業整體發展係好事。
京東健康(06618)今日納入科指及國指等主要指數，並進入「港股通」範圍，今早見180元再創新高，半日升2.8%，報170.7元。不過京東健康炒到去180元都夠晒皮，睇嚟呢段時間可能要整固，加上長假期在即，呢啲位嘅值博率有減，炒開京東健康嘅缸邊友，都要考慮落車食糊將錢袋。
麥狄文
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。